84132

कणकवलीत ‘आठवणीतले जयाकाका’

आचरेकर प्रतिष्‍ठानमध्ये दळवींच्या आठवणींना उजाळा

सकाळ वृत्तसेवा
कणकवली, ता. १३ ः जयवंत दळवी यांच्या जन्मशताब्दी वर्षानिमित्त वसंतराव आचरेकर सांस्कृतिक प्रतिष्ठानच्या नाट्यगृहात ‘आठवणीतले जयाकाका’ हा विशेष कार्यक्रम झाला. यात दळवी यांचे पुतणे पुरुषोत्तम उर्फ सचिन दळवी आणि पुतणी नीला इनामदार यांनी त्यांच्या आठवणींना उजाळा दिला.
कार्यक्रमाचे उद्‍घाटन नीला इनामदार आणि सचिन दळवी यांच्या हस्ते झाले. यावेळी आचरेकर प्रतिष्‍ठानचे माजी अध्यक्ष वामन पंडित, प्रकाश मुसळे, सुरेश बिले उपस्थित होते.
संवादक प्रसाद घाणेकर यांच्या प्रश्नांना उत्तरे देताना घरातील वडीलधारी आणि लेखक म्हणून जयवंत दळवी यांच्या व्यक्तिमत्त्वाचे अनेक पैलू सचिन दळवी यांनी उलगडले. तर अमेरिकेतून खास कणकवलीतील कार्यक्रमासाठी आलेल्या नीला इनामदार यांनी परदेशात दळवींची नाटके सादर करण्याचा अनुभव आणि अभिमान व्यक्त केला. सचिन दळवी यांनी जन्मशताब्दी वर्षानिमित्त ३२ पुस्तके वाचून त्यांच्याशी आपुलकी अधिक वाढल्याची भावना मांडली. जयवंत दळवी यांनी लिहिलेली पुस्तकेही वाचकांनी वाचावी, ही त्यांना खऱ्या अर्थाने श्रद्घांजली ठरेल, अशी भावना त्यांनी बोलताना व्यक्त केली.
कार्यक्रमात, आपल्याला निर्माण करताना आपल्यावर अन्याय झाला आहे अशी फिर्याद करत जयवंत दळवी यांच्यावर प्रश्नांच्या फैरी झाडणारा धर्मानंद आणि त्याच्या प्रश्नांना उत्तरे देणारे दळवी या अभिनव पत्रव्यवहाराचे अभिवाचन प्रसाद घाणेकर व नीलेश कोदे यांनी केले. कार्यक्रमाला प्रतिष्ठानचे कार्याध्यक्ष अ‍ॅड. एन.एन. देसाई, विश्वस्त डॉ. समीर नवरे, दामोदर खानोलकर, राजा राजाध्यक्ष, शरद सावंत, लीना काळसेकर, चित्रा कोदे, डॉ. मिलिंद कुलकर्णी, सुनील पाटील, डॉ. दर्शना कोलते, डॉ. प्रशांत कोलते, डॉ. बाळकृष्ण गावडे, विलास बुचडे, सीमा कोरगावकर, सोनाली कोरगावकर, धनराज दळवी, मनोज मेस्त्री, ज्योती पंडित, उज्ज्वला धानजी आदी उपस्थित होते.