84134

‘कवी कट्ट्या’वर आनंददायी काव्यप्रवाह

कणकवलीत ‘कोमसाप’च्या कार्यक्रमाला प्रतिसाद

कणकवली, ता. १३ ः कोकण मराठी साहित्य परिषद कणकवली शाखेतर्फे ‘कवी कट्टा’ कार्यक्रम झाला. यात अनेक कवींनी सादर केलेल्या काव्यांचा प्रवाह खूपच आनंददायी ठरला. कोमसाप कणकवलीचे अध्यक्ष माधव कदम यांच्या अध्यक्षतेखाली जिल्‍हा परिषद शाळा क्र.५ च्या सभागृहात हा कार्यक्रम झाला.
या कार्यक्रमाला प्रमुख पाहुणे म्हणून कोकण मराठी साहित्य परिषदेचे जिल्हा संघटक आणि प्रसिद्ध मालवणी कवी रुजारियो पिंटो हे प्रमुख पाहुणे म्हणून उपस्थित होते. या कवी कट्टा कार्यक्रमात अगदी छोट्या कवींनी देखील बालकविता सादर केल्या. मालवणी कवी रूजारिओ पिंटो यांनी अनेक मालवणी कविता सादर करत रसिकांची मने जिंकली. कसाल येथील उद्योजक संतोष कदम यांनीही कविता सादर केली. सामाजिक कार्यकर्ते बाळू मेस्त्री यांनी सलाम कविता सादर करून सर्वसामान्यांच्या समस्यांकडे लक्ष वेधले. त्‍यानंतर कवयित्री कल्पना मलये, गणेश जेठे, सत्यवान साटम यांनी रोजच्या जगण्यातील दुःख आपल्या कवितेतून मांडले.
कवी रामचंद्र शिरोडकर यांनी मालवणी कविता गायली. निशिगंधा गावकर, मालिनी लाड, रीमा भोसले, मालवणच्या कवयित्री ऋतुजा केळकर यांनीही कवितांचे सादरीकरण केले. अंगुलीमान पवार यांनी ‘माझी माय मराठी’, श्रेयस शिंदे यांनी ‘रुटीन’ आणि काशिनाथ वर्देकर यांनी ‘तुला व्हायचे आहे’ ही कविता सादर केली.
उमश्री दळवी या बाल कवियत्रीने ‘पाऊस’ आणि सोहम यादव याने ‘पाऊस’ ही कविता सादर केली. सूत्रसंचालन आणि कविता सादरीकरण सिद्धेश खटावकर यांनी केले तर नीलेश ठाकूर यांनी आभार मानले. कार्यक्रमात सर्व सहभागी कवींना पाहुण्यांच्या हस्ते प्रशस्तीपत्रक देण्यात आले. दोन तासांचा हा कार्यक्रम खूपच आनंददायी होता, अशा प्रतिक्रिया उपस्थित रसिकांनी दिल्या.