84190
म्हापण सोसायटी संचालक
मडवळ यांचे उद्या उपोषण

सकाळ वृत्तसेवा
म्हापण, ता. १३ ः येथील विविध कार्यकारी सेवा सहकारी संस्थेवर अनागोंदी कारभाराचा आरोप करत या सगळ्याची चौकशी करून कोणतीही कायदेशीर कारवाई होत नसल्याचा दावा करत संस्थेचे संचालक गुरुनाथ उर्फ नाथा मडवळ यांनी शुक्रवारी (ता. १५) म्हापण सोसायटी कार्यालयासमोर बेमुदत उपोषणाला बसण्याचा इशारा दिला आहे. त्यांनी याबाबतचे निवेदन पालकमंत्री, जिल्हाधिकारी, आमदार दीपक केसरकर, जिल्हा उपनिबंधक, सहकारी संस्था ओरोस, सहाय्यक निबंधक सहकारी संस्था, वेंगुर्ले, वेंगुर्ले तहसीलदार आदींना दिले आहे.
यात म्हटले आहे की, आपण २०२३-२८ साठी संचालक म्हणून बिनविरोध निवडून आलो असून, मागील दोन वर्षांमध्ये संचालक म्हणून काम केले आहे. या संस्थेत मनमानी कारभार असल्याचे आपल्या लक्षात आले आहे. खोटे दस्ताऐवज करून कर्ज घेणे, कर्जरोखे न करता कर्ज देणे, त्यांच्या नावे कर्जमाफी घेणे, मृतांच्या नावे कर्ज घेणे आदी आरोप त्यांनी या निवेदनातून केले आहेत. याबाबत वेळोवेळी मासिक सभांमध्ये चर्चा झाली असून, चौकशीसाठी ठरावही केले आहेत. अशा कारभारामुळे संस्थेच्या हितास बाधा येईल, असेही यात नमूद आहे. या सगळ्याची सखोल चौकशी करून योग्य कारवाई करावी, यासाठी उपोषणाला बसणार आहे.