84174

चाहूल गणेशोत्सवाची.............लोगो

वाद्य बनवणारे कारागीर मंडणगडात दाखल
ढोलकी, तबल्याला मागणी; आरती, भजनांचे सूर घुमणार
सकाळ वृत्तसेवा
मंडणगड, ता. १३ः गणेशोत्सवाकरिता ढोलकी, तबला वाद्यनिर्मिती करणारे कामगार शहरात दाखल झाले असून, बाजारपेठेत ढोलकी-तबल्यांचे आवाज घुमू लागले आहेत. गणेशोत्सवात भजन व आरतीसाठी पारंपरिक वाद्यांची गरज भासते. त्यामुळे ही वाद्ये सजवणी करणारे राज्यभरातील कुशल कारागीर मंडणगड शहरात आले असून, बाजारपेठही विविध साहित्यांनी सजू लागली आहे.
यंदा गणेशोत्सवात वाद्ये सजवून देण्यासाठी चिपळूण, पुणे, पंढरपूर व महाड येथील दुकानदार मंडणगड शहरात दाखल झाले आहेत. त्यामुळे वाद्य सजवणीच्या कामामध्ये मोठी स्पर्धा दिसून येत आहे. गणपती व शिगमा या दोन सणांसाठी ढोलकी, नाल, तबला या वाद्यांची आवश्यकता भासते. नाच, भारूड, तमाशा, गौरीगणेश नृत्य, टिपरी नृत्य, आरती व भजनाकरिता या वाद्यांची गरज असते; मात्र बहुतांश लोक वाद्यांची निगराणी उत्तम पद्धतीने करत नाहीत. कार्यक्रम संपल्यावर वाद्ये कोठेही, कशीही ठेवली जातात. वातावरणातील बदलांचा परिणाम चर्मवाद्यांवर होतो. वर्षातून दोनवेळा वाद्यांची कुशल कारगीराकडून दुरुस्ती करून घ्यावी लागते. वाढत्या महागाईमुळे वाद्यांकरिता दरवर्षी वाढत असलेला खर्च लक्षात घेता याबाबतीत समाजमन उदासीन होत आहे. यंदा मंडणगड बाजारात अचानक दुकाने वाढली आहेत. त्याचा परिणाम दरावर झाला असून, तालुकावासीयांना या स्पर्धेचा लाभ होणार आहे.

चौकट
पंधरा दिवसांत लगबग वाढणार
पंढरपूर येथील विठ्ठल समर्थ तबला मेकर्सचे सूरज भोसले यांनी दरवर्षीप्रमाणे यंदाही बाजारात दुकान थाटले आहे. व्यवसायासह गणपत्ती बाप्पांची सेवा होते, या भावनेने व्यवसाय कमी होवो अथवा अधिक होवो, भोसले दरवर्षी मंडणगडला येतात. जन्माष्टमी जवळ आली आहे. त्यामुळे पुढील पंधरा दिवसांत मूर्तिकारांसारखीच वाद्य कामगारांची लगबग असते.