शिल्लक काम २० ऑगस्टपूर्वी पूर्ण करून देणार
उपोषणाचे यश; महामार्गचे अधिकारी, ठेकेदार भांबावले
सकाळ वृत्तसेवा
संगमेश्वर, ता. १३ : महामार्ग प्राधिकरणाच्या कार्यपद्धतीविरोधात राहुल गुरव यांनी उपोषण केल्यानंतर संगमेश्वर तालुक्यातील जनसामान्यांचा उत्स्फूर्त प्रतिसाद मिळू लागला. या उपोषणाने संबंधित अधिकारीवर्ग आणि ठेकेदार कंपनीचे धाबे दणाणले. त्यांनी तत्काळ संपर्क साधत महामार्गावरील शिल्लक राहिलेली कामे येत्या २० ऑगस्टपूर्वी पूर्ण करू, असे लेखी आश्वासन दिले. त्यामुळे आंदोलनामुळे संथ प्रशासन जागे झाले असून, पुढील काही दिवसांत त्यावर गांभीर्याने कार्यवाही करावी लागणार आहे.
आंदोलनाचे हत्यार उपसल्यावर कायदा सुव्यवस्थेचा प्रश्न उद्‌भवणार म्हणून पोलिस प्रशासनाने मध्यस्थी करून महामार्ग प्राधिकरण आणि आंदोलनकर्ते यांच्यात समन्वय बैठक झाली. समस्यांचे आठ ते दहा मुद्दे चर्चेला आले. दहा दिवसांत त्या समस्यांचे महामार्ग प्राधिकरणाने निराकरण करण्याचे पोलिस प्रशासनासमक्ष आश्वासन दिले; पण ती आश्वासने हवेत विरली. त्यामुळे उपोषण सुरू झाले. सोमवारी रात्री उशिरापर्यंत घडामोडी सुरू होत्या. रात्री साडेनऊ ते दहा वाजण्याच्या दरम्यान अधीक्षक अभियंता अनामिका जाधव, कार्यकारी अभियंता आणि ठेकेदार चर्चेला आले. या चर्चेत पत्रकार, स्थानिक नागरिक यांनी मोठी भूमिका बजावली. आलेल्या अधिकाऱ्यांना समस्यांचा पाढा वाचून दाखवला.
मुंबई-गोवा महामार्गावर आरवली ते संगमेश्वर, बावनदी या भागात सुरू असलेल्या गलथान, दर्जाहीन कामाचा आरसा दाखवला. अनेक अपघात झाले. महामार्गावर कामादरम्यान धावणाऱ्या वाहनांची तपासणी व्हावी. बहुतांशी वाहने धूर ओकत असताना दिसत आहेत. त्या वाहनांचे व्हिडिओ संबंधित अधिकाऱ्यांना दाखवले; पण काही उपयोग झाला नाही. आता आरटीओला पत्र देऊन कारवाई करण्यात येईल, असे सांगण्यात आले.
उपोषणकर्ते गुरव आणि उपस्थित नागरिकांनी मांडलेल्या समस्यांनी अधिकारी, ठेकेदार भांबावून गेले होते. शेवटी आश्वासक शब्दात या समस्यांचे निराकरण करण्याचे अभिवचन जाधव यांनी दिले. यावर उपस्थितांनी आश्वासन लेखी स्वरूपात मिळणार असेल, तर उपोषण स्थगित करण्यावर एकमत झाले.

चौकट
शाळेशेजारी प्रवासी निवाराशेड
पैसाफंड हायस्कूलशेजारी प्रवासी निवाराशेड दोन दिवसांत मजबूत बांधून देण्याचे कबूल केले. आजवर शाळकरी मुलांना भरपावसात एसटीची वाट पाहावी लागायची. रस्त्याने भरधाव जाणाऱ्या गाड्या खड्ड्यातील पावसाच्या पाण्याने शाळेचे गणवेश भिजवून जायचे. अखेर सर्व मागण्या मान्य करण्याचे लेखी आश्वासन प्राप्त झाल्याने गुरव यांनी पुकारलेले उपोषण थांबवले.