चिपळुणात गाण्यांची ‘बरसात’
वाशिष्ठी डेअरी ; संगीतप्रेमींसाठी मेजवानी
सकाळ वृत्तसेवा
चिपळूण, ता. १३ ः वाशिष्ठी डेअरी आयोजित ‘बरसात’ मराठी-हिंदी हा कार्यक्रम संगीतप्रेमींसाठी मेजवानीच ठरला. प्रत्येक गाण्यांवर टाळ्यांची बरसात होत होती. हा कार्यक्रम येथील इंदिरा गांधी सांस्कृतिक केंद्रात पार पडला.
चिपळूण येथे झालेल्या या कार्यक्रमाला डेअरीचे चेअरमन प्रशांत यादव व मुख्य प्रवर्तक स्वप्ना यादव उपस्थित होते. श्रावण महिन्यानिमित्त वाशिष्ठी डेअरीने ‘बरसात’ हा मराठी-हिंदी गाण्यांचा कार्यक्रम आयोजित केला होता. याचे उद्‍घाटन भिले येथील प्रगतशील शेतकरी केतकर यांच्या हस्ते झाले. सूर नवा ध्यास नवा आणि सारेगमप या प्रसिद्ध कार्यक्रमातील गायक निहिरा जोशी, अनिरुद्ध जोशी, अभिषेक नलावडे, ईशानी पाटणकर यांनी आपल्या मधूर, सुरेल आणि मनमोहक आवाजाने प्रेक्षकांना मंत्रमुग्ध केले. त्यांना सुयोग कांबळे, सुमित जाधव, अमित गोठीवरेकर, किशोर नारखेडे, गुरू ढोले, विक्रम परीट या वाद्यवृंदांनी साथ दिली. अभिजित गोडबोले यांनी अतिशय सुरेख निवेदन केले.

चौकट
चिपळूणवासियांनी धरला ठेका
श्रावण आणि पाऊस यांचा सुरेख संगम साधणारा आणि त्यावर आधारित मराठी, हिंदी तसेच क्लासिकल गाण्यांचा भरगच्च मेलोडियस नजराणा वाशिष्ठी डेअरीच्या माध्यमातून चिपळूणकरांपुढे सादर करण्यात आला. त्याला नागरिकांनी भरभरून प्रतिसाद दिला. अनेक गाण्यांवर संगीतप्रेमींनी तालबद्ध ठेका धरला.