‘शक्तिपीठ’विरोधी वातावरणामुळे
राज्यकर्त्यांकडून खोटी आश्वासने

डॉ. परुळेकर ः महामार्ग नेमका कोणासाठी?

सकाळ वृत्तसेवा
सावंतवाडी, ता. १३ ः शक्तिपीठ महामार्ग आंबोली, गेळे येथून पारपोली नेनेवाडी घारपी फुकेरी असनिये तांबोळी डेगवे बांदा असाच जात असल्याचे आजही शासन दरबारी दिसून येत आहे. मात्र, जनतेचा विरोध पाहता तो झाराप झिरो पॉईंट किंवा मळगाव येथून वळवून आणला जाईल, अशी पोकळ आश्वासने राज्यकर्ते देत असल्याची टीका डॉ. जयेंद्र परुळेकर यांनी केली.
श्री. परुळेकर यांनी पत्रक प्रसिद्धीस दिले आहे. त्यात म्हटले आहे की, शक्तिपीठ महामार्ग विरोधी वातावरण सिंधुदुर्ग जिल्ह्यातील आंबोली ते बांदा या बारा गावांमध्ये तयार होऊ लागल्यावर जिल्ह्याचे पालकमंत्री आणि सावंतवाडी विधानसभा क्षेत्राचे आमदार यांनी आंबोलीवरून ‘शक्तिपीठ’चा मार्ग झाराप झिरो पॉईंट किंवा मळगावपर्यंत वळवून आणला जाईल आणि तेथून रेडी बंदरापर्यंत आणि तिलारीपर्यंत रस्ते नेले जातील, अशी पोकळ आश्वासने दिली आहेत. खरेतर आजही शासन दरबारी शक्तिपीठ महामार्ग आंबोली गेळे येथून पारपोली नेनेवाडी घारपी फुकेरी असनिये तांबोळी डेगवे बांदा असाच जात असल्याचे दिसून येते.
बारा जिल्ह्यांतून जाणाऱ्या या महामार्गाची प्रस्तावित किंमत सुरुवातीला ८६ हजार कोटी रुपये होती, ती आता १ लाख १० हजार कोटी रुपये झाल्याचे समजते. एकीकडे शासनाच्या तिजोरीत खडखडाट आहे, कंत्राटदारांची जवळपास ९० हजार कोटींची बिले थकीत आहेत, असे असताना एवढा मोठा अवाढव्य खर्च करून हा महामार्ग कोणासाठी बांधला जात आहे? हजारो हेक्टर जमीन शेतकऱ्यांकडून बळजबरीने संपादित करून, लाखो वृक्षांची कत्तल करून बांधण्यात येत असलेल्या या महामार्गाचा पर्यावरणीय आघात अहवाल शासनाने अभ्यासला आहे का? पर्यावरणीय परवानगीशिवाय हा महामार्ग बांधणे शक्य आहे का? असा प्रश्‍नही डॉ. परुळेकर यांनी केला आहे.