swt1416.jpg
84453
देवगड ः येथील उमाबाई बर्वे ग्रंथालयामध्ये ग्रंथप्रदर्शनाचे आयोजन करण्यात आले होते.

देवगडातील ग्रंथप्रदर्शनाला
वाचकांचा उत्स्फूर्त प्रतिसाद
सकाळ वृत्तसेवा
देवगड, ता. १४ः येथील उमाबाई बर्वे ग्रंथालयामध्ये भारतीय ग्रंथालयशास्त्राचे जनक डॉ. एस. आर. रंगनाथन यांचा जन्मदिन ग्रंथपाल दिन म्हणून साजरा करण्यात आला. यानिमित्त ग्रंथालयाने खरेदी केलेल्या ग्रंथांचे प्रदर्शन भरविले होते. याला वाचकांकडून प्रतिसाद लाभला.
या ग्रंथप्रदर्शनाचे उद्घाटन येथील शेठ म. ग. हायस्कूलचे मुख्याध्यापक प्रवीण खडपकर यांच्या हस्ते झाले. यावेळी श्री. खडपकर यांनी, डॉ. रंगनाथन हे भारतीय ग्रंथालयशास्त्राचे जनक आहेत. देशात ग्रंथालय व माहितीशास्त्राची मुहुर्तमेढ त्यांनी रोवली. त्यांच्या ग्रंथालय शास्त्राच्या पंचसूत्रीप्रमाणे देशातील ग्रंथालयांचे व्यवस्थापन होत आहे.
भारतीय ग्रंथालय चळवळीत त्यांचा सिंहाचा वाटा असून वाचक चळवळ वृद्धिंगत करण्यासाठी सार्वजनिक ग्रंथालयांचे योगदान मोठे असल्याचे नमुद करून येथील बर्वे ग्रंथालय विविध उपक्रमाद्धारे वाचकांना सेवा देत असल्याचे त्यांनी सांगितले. ग्रंथालयाचे सचिव सीताराम पाटील यांनी, डॉ. रंगनाथन यांच्या जीवन चरित्राचा आढावा घेतला. सागर कर्णिक यांनी, ग्रंथपाल दिनानिमित्त आपले मनोगत व्यक्त केले. ग्रंथालयाचे अध्यक्ष गुरूदेव परूळेकर यांनी श्री. खडपकर यांचे स्वागत केले. तसेच श्री. खडपकर यांची शेठ म. ग. हायस्कूलच्या मुख्याध्यापकपदी नियुक्ती झाल्याबद्दल त्यांचा ग्रंथालयातर्फे सत्कार केला. ग्रंथपाल प्रशांत बांदकर यांनी प्रास्ताविक केले. श्री. पाटील यांनी आभार मानले.
यावेळी ग्रंथालयाच्या उपाध्यक्षा उत्तरा जोशी, लक्ष्मण लोंढे, मिसबाह गिरकर, प्रकाश पंडित तसेच वाचक उपस्थित होते. हे ग्रंथप्रदर्शन मंगळवारपर्यंत (ता.१९) सर्वांसाठी खुले राहणार आहे. ग्रंथालयाच्या सर्व वाचकांनी जास्तीत जास्त या ग्रंथप्रदर्शनाचा लाभ घ्यावा, असे आवाहन डॉ. परूळेकर यांनी यावेळी केले.