लाजूळ विद्यालयात
शैक्षणिक साहित्य वाटप
रत्नागिरी ः रत्नागिरी तालुक्यातील लाजूळ माध्यमिक विद्यालयात विद्यार्थ्यांना रोटरी क्लब ऑफ पुणे युनिव्हर्सिटी यांच्या सहयोगाने गणवेश व शैक्षणिक साहित्यांचे वाटप करण्यात आले. या वेळी विद्यालयाचे मुख्याध्यापक महेंद्र कुवळेकर, हातखंबा हायस्कूलचे माजी प्रा. चंद्रमोहन देसाई, दै. सकाळ माध्यम समूहाचे रत्नागिरीतील उपसंपादक राजेश कळंबटे, वितरण प्रतिनिधी चिनार नार्वेकर आणि सावंत उपस्थित होते. देसाई यांनी विद्यार्थ्यांच्या शैक्षणिक गुणवत्तेचे कौतुक करून विद्यार्थ्यांनी स्वतःतील कलाकौशल्य विकसित करण्यावर भर देण्याचे आवाहन केले. नार्वेकर यांनी दै. सकाळमार्फत विद्यार्थ्यांसाठी राबवल्या जाणाऱ्या विविध उपक्रमाविषयी विद्यार्थ्यांना माहिती दिली.

सावर्डे महाविद्यालयात
पोलिस भरतीबाबत मार्गदर्शन
सावर्डे ः पोलिस भरतीत यशस्वी होण्यासाठी योग्य तयारी गरजेची आहे, असे मत चिपळूण उपविभागीय पोलिस अधिकारी प्रकाश बेले यांनी व्यक्त केले. सावर्डे महाविद्यालयात सुरू असलेल्या करिअर कट्टा या विभागामार्फत पोलिस भरती प्रशिक्षण केंद्रात ते बोलत होते. या वेळी प्राचार्य टी. वाय. कांबळे, उपसरपंच मजीद मुल्लाजी उपस्थित होते. बेले यांनी पोलिससेवेत प्रवेशासाठी आवश्यक शारीरिक क्षमता, मानसिक स्थैर्य आणि बौद्धिक तयारी यांचे महत्त्व सांगितले. कार्यक्रमादरम्यान करिअर कट्टा विभागामार्फत सर्व प्रशिक्षणार्थींना टी शर्टचे वाटप करण्यात आले.

कुंभारखाणी बुद्रुक
प्रशालेत विविध कार्यक्रम
सावर्डे ः संगमेश्वर तालुक्यातील मौजे कुंभारखाणी बुद्रुक माध्यमिक विद्यामंदिरामध्ये स्वातंत्र्यदिनानिमित्त आठवी शिष्यवृत्ती परीक्षेत संगमेश्वर तालुका गुणवत्ता यादीत स्थान मिळवल्याबद्दल साई कदम याचा आणि पोलिसपाटील राकेश सुर्वे यांना उत्कृष्ट पोलिसपाटील म्हणून पुरस्कार मिळाल्याबद्दल सत्कार करण्यात आला. या प्रसंगी शालेय समिती अध्यक्ष कृष्णकांत सुर्वे, संघाध्यक्ष संतोष सुर्वे, माजी सैनिक संजय साळवी, राजेंद्र कदम, गुणाजी साळवी, शालेय समिती अध्यक्ष राजेंद्र कदम, सरपंच वंदना सुर्वे, उपसरपंच अनिल सुर्वे आदी उपस्थित होते. या निमित्ताने प्रशालेत देशभक्तिपर गीतगायन व नृत्य कार्यक्रम झाला. संजय साळवी, विकास सुर्वे, दत्ताराम सुर्वे, गुणाजी साळवी आदींनी रोख पारितोषिक देऊन विद्यार्थ्यांचा गौरव केला.