गावडेंच्या प्रामाणिकतेमुळे
महिलेला मंगळसूत्र परत

सकाळ वृत्तसेवा
सावंतवाडी, ता. १६ ः आकेरी गावडेवाडी येथील प्रल्हाद गावडे यांच्या सतर्कतेमुळे नेमळे येथील महिलेचे मंगळसूत्र परत मिळाले. स्वातंत्र्यदिनी नेमळे ग्रामपंचायत येथे बोलावून गावडे यांचा सत्कार करण्यात आला. त्यांच्या प्रामाणिकपणाचे कौतुक होत आहे.
गुरुपौर्णिमेदिवशी नेमळे देऊळवाडी येथील भिकाजी कलांगण आणि त्यांची पत्नी सीताबाई सावंतवाडी येथूल आकेरीमार्गे घरी येत असताना दुचाकी रस्त्यावर पडलेल्या खड्ड्यात गेली. यावेळी सीताबाई यांच्या हातातील पर्स रस्त्यावर पडली. घरी पोहोचल्यानंतर त्यांच्या पर्स नसल्याचे लक्षात आले. त्यांनी पतीला सांगितल्यानंतर शोधाशोध करण्यात आली. मात्र, पर्स मिळाली नाही. याचवेळी आकेरी गावडेवाडी येथील युवक प्रल्हाद गावडे त्यांच्या मागून घरी येत असताना त्यांना ती पर्स मिळाली. त्यात असलेल्या आधार कार्डवरील पत्त्यावरून त्यांनी कलांगण यांच्याशी संपर्क साधून त्या पर्समध्ये आसलेले मंगळसूत्र, आधार कार्ड, एटीएम कार्ड कलांगण यांच्या घरी नेऊन दिले. कलांगण दांपत्याने त्यांचे आभार मानले. स्वातंत्र्यदिनी नेमळे ग्रामपंचायत येथे बोलावून गावडे यांचा कलांगण यांनी सरपंच दीपिका भैरे, उपसरपंच सखाराम राऊळ यांच्या हस्ते सत्कार केला. शिक्षिका परब यांनी शाळेतील मुलांना गावडे यांचा आदर्श प्रत्येकाने जोपसावा, असे आवाहन केले.