84971

वेंगुर्लेत अमली पदार्थांविरोधात जागृती
वेंगुर्ले, ता. १७ ः पोलिस अधीक्षक मोहन दहीकर व अतिरिक्त पोलिस अधीक्षक नयोमी साटम यांच्या संकल्पनेनुसार येथील पोलिस ठाण्यातर्फे अमली पदार्थ विरोधी सप्ताह साजरा करण्यात आला. याप्रसंगी एक किलोमीटर अंतरापर्यंत मानवी साखळी तयार करून अमली पदार्थ विरोधी लढा अधिक तीव्र करण्याचा संकल्प केला. हा कार्यक्रम गुरुवारी (ता. १४) वेंगुर्ले हायस्कूल येथे झाला.
यावेळी पोलिस निरीक्षक निसर्ग ओतारी, उपनिरीक्षक शेखर दाभोलकर, महिला हेड कॉन्स्टेबल अनुराधा देसाई, तुलशी कोंबे, पोलिस कॉन्स्टेबल सागर चौगुले, मुख्याध्यापक सचिन बिडकर यांच्यासह शिक्षक, कर्मचारी आणि विद्यार्थी उपस्थित होते. पोलिस निरीक्षक ओतारी यांनी विद्यार्थ्यांना अमली पदार्थ म्हणजे काय० त्याचे मानवाच्या शरीरावर व मनावर होणारे दुष्परिणाम, अमली पदार्थांचे स्वरूप, अंमली पदार्था विरोधी कायदे याबाबत माहिती दिली. शाळेतील सर्व शिक्षक व विद्यार्थी यांना अमली पदार्थविरुद्ध पोलिस प्रशासनाने सुरू केलेल्या लोकचळवळीमध्ये सहभागी होण्यासाठी आवाहन केले. तसेच स्वलिखित ‘व्यसन’ ही कविता मुलांना ऐकवली. या कार्यक्रमात शाळेच्या कबड्डी टीमने तालुका स्पर्धेमध्ये यश मिळवून जिल्हा स्पर्धेमध्ये प्रवेश केल्याबाबत ओतारी यांनी अभिनंदन केले.