‘सावंतवाडीतील मोकाट
गुरांचा बंदोबस्त करा’
सावंतवाडी, ता. १८ ः शहरात मोकाट गुरांचा वावर वाढला आहे. या गुरांमुळे शहरात वाहतुकीला अडथळा निर्माण होत असून रात्रीच्या वेळी अपघातासारखे प्रसंग उद्भवत आहेत. त्यामुळे त्यांचा नगरपालिका प्रशासनाने योग्य तो बंदोबस्त करावा, अशी मागणी ठाकरे शिवसेनेचे सावंतवाडी प्रवक्ते आशिष सुभेदार यांनी केली.
सावंतवाडी शहरात भटके कुत्रे आणि मोकाट फिरणाऱ्या गायींचा वावर वाढला आहे. बहुतांशी या गुरांचे मालक त्यांना मोकळे सोडून देत असून त्यांची योग्य निगा राखली जात नाही. परिणामी ही गुरे शहरातील रस्त्यांवर बेवारस फिरताना आढळून येतात. वाहनचालकांना गुरांचा अडथळा सहन करावा लागतो. रात्रीच्या वेळी वाहन चालवताना गुरे नजरेस पडत नसल्याने त्यांना ठोकर देत अपघातही होत आहेत. शहरातील समाज मंदिर, भटवाडी, जिमखाना, खासकिलवाडा, सालईवाडा, शिरोडा नाका, भाजी मार्केट या ठिकाणी मोकाट गुरे दिसून येत असून, मोती तलावाच्या फुटपाथवर ती सातत्याने फिरताना दिसतात. यामुळे नागरिकांनाही त्रास सहन करावा लागतो. शहराच्या सौंदर्यालाही बाधा पोहोचत आहे. सध्याच्या भाजी मंडई परिसरात मोकाट गुरांसाठी कोंडवाडा उभारला होता. मात्र, त्यानंतर बेवारस जनावरांची संख्या वाढू लागल्याने ती जागा अपुरी पडू लागली. आता हा कोंडवाडा बंद झाल्याने भटक्या गायींसाठी जागाच उरलेली नाही. यामुळे शहरात फिरणाऱ्या गायींना एकाच ठिकाणी ठेवून त्यांच्या चारापाण्याची व्यवस्था करावी व मालकांकडून खर्च वसूल करावा; अन्यथा दंड आकारण्यात यावा, अशी मागणी सुभेदार यांनी केली आहे.