फुणगूस-जाकादेवी मार्गावर अपघात
सकाळ वृत्तसेवा
संगमेश्वर, ता.१९ ः गेल्या दोन महिन्यात फुणगूस-जाकादेवी मुख्य मार्गावर फुणगूस येथील पशुवैद्यकीय दवाखान्यासमोरील वळणावरील एका विशिष्ट ठिकाणी वाढते अपघात होत आहेत. विशेषतः या भागात एकाच ठिकाणी वारंवार अपघात होत असल्याने स्थानिक रहिवाशीवर्गात व वाहनचालकात चिंतेचे वातावरण निर्माण झाले आहे. रविवारी संध्याकाळी गणपतीपुळे येथून मुंबई येथे जाणाऱ्या कारचा याच ठिकाणी अपघात झाला . सुदैवाने कोणालाही यात इजा झालेली नाही.
रविवारी संध्याकाळी गणपतीपुळे येथून चारचाकी वाहन घेऊन महेश शर्मा मुंबईकडे जात असताना फुणगूस येथे आले असता याच ठिकाणच्या उतारावरील वळणावर आल्यानंतर थेट त्यांच्या ताब्यातील वाहन रस्ता सोडून बाजूच्या दरीत गेली; मात्र एका झुडपांमुळे खोल दरीत जाता जाता वाचली. या चारचाकी वाहनातून चार प्रवासी प्रवास करत होते. सुदैवाने, त्यांना कोणालाही दुखापत झाली नसल्याचे फुणगूस येथील पोलिस पाटील प्रशांत थूळ यांनी सांगितले.