‘खनिज वाहतूक
गणेशोत्सवात बंद ठेवा’
देवगड, ता. २० ः देवगड नांदगाव मुख्य रस्त्यावरील संभाव्य अपघात टाळण्यासाठी गणेशोत्सव काळात शनिवारपासून (ता.२३) ९ सप्टेंबरपर्यंत गौण खनिज वाहतूक बंद ठेवण्याची शिवसेना शिंदे गटाची मागणी आहे. आपल्या मागणीचे निवेदन तालुकाप्रमुख विलास साळसकर यांनी येथील तहसीलदारांना दिले आहे.
निवेदनात म्हटले आहे, तालुक्यातील गौण खनिज वाहतूक रोज सुमारे १०० गाड्यांची होत असते. बुधवारपासून (ता.२७) गणेत्शात्सव सुरू होत आहे. तालुक्यात तसेच जिल्ह्यामध्ये मुंबईस्थित चाकरमानी स्वतःच्या खासगी गाड्या घेऊन येतात. रस्ता वळणदार असल्याने येणाऱ्या चालकांना अंदाज येत नाही. तसेच गौण खनिज वाहतूक करणारी अवजड वाहने असल्याने व अतीवेगाने वाहन चालवत असल्याने अपघात होण्याची दाट शक्यता आहे. मागील अनुभव पाहता अवजड वाहनांमुळे बऱ्याच निरपराध जनतेची जिवीतहानी झाली आहे. त्यामुळे तहसीलदारांनी गौण खनिज धारकांना सूचना देऊन शनिवारपासून (ता.२३) ९ सप्टेंबरपर्यंत अवजड वाहनांची वाहतूक बंदी करावी अशी मागणी केली आहे.