‘सह्याद्री सेवक’पतसंस्थेचा
१५ टक्के लाभांश जाहीर
चिपळूण, ता. २२ : सह्याद्री शिक्षणसंस्था सेवकांची सहकारी पतसंस्थेची वार्षिक सर्वसाधारण सभा गोविंदराव निकम कॉलेज ऑफ फार्मसीच्या सभागृहात झाली. पतसंस्थेने सभासदांना १५ टक्के लाभांश देण्याची घोषणा केली.
या वेळी सह्याद्री शिक्षणसंस्थेचे कार्याध्यक्ष शेखर निकम, उपाध्यक्ष विजय काटे उपस्थित होते. या प्रसंगी आमदार शेखर निकम म्हणाले, सभासदांच्या उन्नतीसाठी पतसंस्थेचे कार्य उल्लेखनीय आहे; मात्र वर्गणी व शेअर्सच्या माध्यमातून पतसंस्थेने स्वयंपूर्णतेकडे वाटचाल केली पाहिजे. संस्थेच्या शाखांनी मिळवलेली बक्षिसे अभिमानास्पद असली तरी शैक्षणिक दर्जा उंचावण्यासाठी सातत्याने प्रयत्न झाले पाहिजे. २०२४-२५ या वर्षाच्या अहवालास, आर्थिक पत्रकांना, नफावाटपाला तसेच हिशोब तपासणीसांच्या नियुक्तीला मंजुरी देण्यात आली. संचालक मंडळाच्या शिफारशीला मान्यता देत सभासदांना १५ टक्के लाभांश देण्याचा निर्णय घेण्यात आला.