swt113.jpg
90787
दोडामार्गः पोलिस निरीक्षक हेमचंद्र खोपडे यांचे पुष्पगुच्छ देऊन अभिनंदन करताना व्यापारी संघाचे पदाधिकारी. (छायाचित्रः संदेश देसाई)

दोडामार्ग पोलिसांच्या कर्तव्यदक्षतेचे कौतुक
गणेशोत्सवातील चोख नियोजन; व्यापारी संघ, नागरिकांतर्फे सत्कार
सकाळ वृत्तसेवा
दोडामार्ग, ता. ११ : नुकत्याच पार पडलेल्या गणेशोत्सवात संपूर्ण दोडामार्ग शहरासहित विशेषतः दोडामार्ग बाजारपेठेत वाहतुकीचे योग्य नियोजन केल्याबद्दल दोडामार्ग पोलिसांचे नागरिक, व्यापारी यांच्या वतीने विशेष अभिनंदन करण्यात आले.
सिंधुदुर्ग जिल्ह्याच्या टोकावर असलेल्या दोडामार्ग शहरातील बाजारपेठ ही संपूर्ण तालुक्यासोबत गोवा राज्याच्या सीमेवरील गावांसाठी सुद्धा फार महत्त्वाची बाजारपेठ आहे. दोडामार्गलगतच्या गोवा राज्यामधून तेथील डिचोली, बारदेस तालुक्यांतील गावागावांमधील ग्राहक तसेच अनेक फिरते, घाऊक व किरकोळ विक्रेत्यांची गणेश चतुर्थीच्या अगदी पंधरा दिवस अगोदरपासून बाजारपेठेत जास्त ये-जा सुरू असते. शहरातील चारही प्रमुख राज्य मार्गांवर विस्तीर्णपणे पसरत चाललेली दुकाने, व्यापार समूह, सुपर मार्केट या ठिकाणी तसेच चाकरमानी, पाहुणे यांच्याकडेही जाण्या-येण्यासाठी दुचाकी व चारचाकी वाहनांची रांग लागलेली असते. साहजीकच त्यामुळे काहीवेळा वाहतुकीवर ताण पडतो आणि वाहतूक कोंडीची समस्या निर्माण होते; मात्र दोडामार्ग पोलिसांकडून गणेश चतुर्थीच्या पूर्वीपासून वाहतुकीचे विशेष नियोजन केले जाते. यंदा देखील पोलिसांनी विशेषतः गोवा मार्गासहित अन्य मार्गांवर वाहतुकीचे चोख नियोजन केले होते. त्यामुळे वाहतूक कोंडीटी समस्या उद्भवली नाही. त्या पार्श्वभूमीवर शहरातील नागरिक व व्यापारी यांनी पोलिसांचे विशेष अभिनंदन केले. पोलिस निरीक्षक हेमचंद खोपडे यांची भेट घेऊन पोलिस तसेच होमगार्ड यांच्या कामगिरीबद्दल कौतुकास्पद भावना सर्वांनी व्यक्त केल्या.
यावेळी दोडामार्ग तालुका व्यापारी संघाचे अध्यक्ष सागर शिरसाट, माजी नगराध्यक्ष तथा विद्यमान नगरसेवक संतोष नानचे, व्यापारी पांडुरंग बोर्डेकर, शामसुंदर चांदेलकर, सुदेश मळीक, प्रकाश काळबेकर, शुभम पांचाळ, फोंडू हडीकर, ओंकार पेडणेकर, सिद्धू कासार, वैभव इनामदार आदी उपस्थित होते.