सावंतवाडी येथे आज
‘पंचायत राज’ कार्यशाळा
सकाळ वृत्तसेवा
सावंतवाडी, ता. ११ : महाराष्ट्रातील ग्रामपंचायतींची कार्यक्षमता वाढविण्यासाठी आणि त्यांच्या कार्याला प्रोत्साहन देण्यासाठी महाराष्ट्र शासन, ग्रामविकास विभागाच्यावतीने ‘मुख्यमंत्री समृद्ध पंचायत राज अभियान व पुरस्कार’ सुरू केले आहेत. ​या अभियानाच्या प्रभावी अंमलबजावणीसाठी तालुक्यातील सरपंच, उपसरपंच, ग्रामपंचायत अधिकारी, कर्मचारी यांच्यासाठी येथील काझी शाहबुद्दीन हॉल येथे उद्या (ता. १२) दुपारी २ वाजता कार्यशाळेचे आयोजन केले आहे. या अभियानांतर्गत उत्कृष्ट कार्य करणाऱ्या ग्रामपंचायतींना २०२५-२६ पासून तालुका, जिल्हा, महसूल विभाग आणि राज्यस्तरावर २.४३ कोटी रुपयांची रोख बक्षिसे दिली जाणार आहेत. ​हे अभियान १७ सप्टेंबर ते ३१ डिसेंबर या कालावधीत राबविले जाईल. संपूर्ण राज्यातील ग्रामपंचायतींची निवड गुणवत्तेच्या आधारावर केली जाईल. या अभियानात ‘सुशासनयुक्त पंचायत’, ‘सक्षम पंचायत’, ‘जलसमृद्ध हरित गाव निर्माण करणे’, ‘मनरेगा’ आणि इतर योजनांची प्रभावी अंमलबजावणी, ‘गावपातळीवरील संस्थांचे सक्षमीकरण’, ‘उपजीविका विकास’, ‘सामाजिक न्याय’, ‘लोकसहभाग’ आणि ‘श्रमदान’ यांसारख्या बाबींचा समावेश आहे. अभियानाच्या प्रभावी अंमलबजावणीसाठी पार पडणाऱ्या कार्यशाळेत तालुक्यातील सरपंच, उपसरपंच, ग्रामपंचायत अधिकारी आणि ग्रामपंचायत कर्मचारी यांनी सहभागी व्हावे, असे आवाहन गटविकास अधिकारी वासुदेव नाईक यांनी केले आहे.