रेल्वे दरवाजे आतून बंद करणे थांबवा
शौकत मुकादम ः संबधितांवर कारवाई करा
सकाळ वृत्तसेवा
चिपळूण, ता. ११ ः कोकण रेल्वेने प्रवास करणाऱ्यांची संख्या दिवसागणिक वाढत आहे. मुंबईकडे जाणाऱ्या व तिकडून येणाऱ्या रेल्वेच्या डब्याचे दरवाजे आतून लॉक केले जातात. परिणामी, चिपळुणात तिकिटे आरक्षित असलेल्या प्रवाशांनाही आतमध्ये जाता येत नाही. त्यामुळे आरक्षित केलेल्या प्रवाशांचे पैसे फुकट जात आहेत. याची चौकशी करावी तसेच रेल्वेडब्याचे दरवाजे आतून बंद करणाऱ्यांवर रेल्वे पोलिसांनी कारवाई करावी, अशी मागणी कोकण रेल्वे अन्याय निवारण समितीचे अध्यक्ष शौकत मुकादम यांनी केली आहे.
मुकादम म्हणाले, ३ सप्टेंबरला सायंकाळी ३.२० मिनिटांनी मुंबईकडे जाणारी मांडवी एक्स्प्रेस चिपळूण रेल्वेस्थानकावर आली त्या वेळी गाडीचे दरवाजे आतून बंद करण्यात आले होते. त्यामुळे आरक्षण केलेले सर्व प्रवासी चिपळूण रेल्वेस्थानकावरच राहिले. प्रवाशांनी ही घटना आरपीएफ पोलिसांच्या निदर्शनास आणून दिली; परंतु आरपीएफ पोलिसांनी फक्त बघ्याची भूमिका घेतली. प्रवाशांच्या तक्रारी कोकण रेल्वे अन्याय निवारण समितीकडे आल्या आहेत. याची तक्रारही समितीचे अध्यक्ष मुकादम यांनी रेल्वे प्रशासनाकडे केली आहे. रेल्वेचे दरवाजे आतून लॉक करणे हा कायद्याने गुन्हा आहे. यापुढे रेल्वे प्रशासनाने याकडे त्वरित लक्ष द्यावे अन्यथा आम्हाला दरवाजे उघडावे लागतील, असा इशारा मुकादम यांनी दिला आहे.
----