बचतगट पैशाच्या व्यवहारातून
तिघांना मारहाण, दोघांवर गुन्हा

वाघेरी खाड्याचे मांगर येथील घटना

कणकवली, ता. १२ ः बचतगटातील पैशावरून वादंग झाल्‍याने तिघांना मारहाण झाल्‍याची घटना तालुक्‍यातील वाघेरी खाड्याचे मांगर येथे काल (ता.११) सायंकाळी साडेसहाच्या सुमारास घडली. यातील तिघा जखमींवर कणकवली उपजिल्‍हा रुग्णालयात उपचार सुरू आहेत. उमेश अशोक खेडकर (वय ३५, रा. वाघेरी खाड्याचे मांगर) यांनी याबाबतची फिर्याद आज पोलिस ठाण्यात दिली. याप्रकरणी दोघांवर गुन्हा दाखल झाला आहे.
उमेश यांनी फिर्यादीत म्‍हटले आहे की, त्‍यांच्या शेजारी राहणारे सुधाकर गोसावी यांच्यात काही दिवसांपासून बचतगटातील पैशावरून वाद सुरू होते. काल (ता.११) सायंकाळी साडेसहा वाजता उमेश खेडकर हे वाघेरी येथे आले. त्‍यावेळी सुधाकर गोसावी हा लाकडी दांडा घेऊन आला. त्‍या दांड्याने उमेश खेडकर यांना मारहाण केली. हा प्रकार सुरू असताना उमेश यांची आई अनिता आणि पत्‍नी चेतना तेथे आली. तसेच सुधाकर गोसावी याची पत्‍नी वंदना गोसावीदेखील तेथे आली. तिने तिघांना सोडू नका, दांड्याने झोडून काढा, असे आपला पती सुधाकर याला सांगितले. त्‍यानंतर सुधाकर गोसावीने उमेश खेडकर यांना लाकडी दांड्याने मारहाण केली. यात त्‍यांच्या उजव्या हाताला, डाव्या पायाला दुखापत झाली, तर लाकडी दांड्याने मारहाण करताना उमेश यांची आई अनिता आणि पत्‍नी चेतना त्‍यांना सोडविण्यासाठी आली. यावेळी अनिता यांच्या उजव्या हाताच्या कोपरावर दांड्याला असलेल्‍या खिळा लागून दुखापत झाली, तर उमेश यांची पत्‍नी चेतना हिच्या पोटावर, दोन्ही हातावर आणि डाव्या पायाच्या मांडीवर सुधाकर याने दांडा मारून दुखापत केली. या प्रकरणी उमेश खेडकर याने दिलेल्‍या फिर्यादीनुसार, सुधाकर गोसावी आणि त्‍याची पत्‍नी वंदना यांच्याविरोधात भारतीय न्याय संहिता कलम ११८ (१), ३ (५) आणि ३५२ नुसार गुन्हा दाखल केला आहे. घटनेचा अधिक तपास पोलिस हवालदार चंद्रकांत झोरे करत आहेत.