सर्दी, तापाच्या रुग्णांची
पावस परीसरात वाढ
वातावरण बदलाचा परिणाम; औषधोपचारावर भर
सकाळ वृत्तसेवा
पावस, ता. १४ः वातावरणातील बदलामुळे पावस परीसरामध्ये सर्दी, तापाच्या रुग्णांची संख्या वाढलेली आहे. अंगदुखी, डोकेदुखी, सतत झोप येणे, पायात गोळे येणे, पाय वळणे यासारखे त्रास ग्रामीण भागातील लोकांमध्ये दिसत आहेत. त्यामुळे ग्रामीण भागातील वैद्यकीय अधिकाऱ्यांकडे रूग्णांची संख्या वाढत आहे.
पावस परीसरात दिवसाला शंभरहून अधिक लोकं खासगी रुग्णालयात तपासणीसाठी जात असल्याचे पुढे आले आहे. दररोज रुग्णांची संख्या वाढत आहे. दोन-तीन वेळा तपासणी करूनही प्रकृतीत सुधारणा होत नसल्याने आर्थिक भूर्दंडही बसत आहे. हजारो रुपये खर्च करूनही आराम न मिळाल्याने ग्रामस्थ त्रस्त झाले आहेत. या पार्श्वभूमीवर पावस प्राथमिक आरोग्य केंद्रांतर्गत गावोगाव प्रतिबंधक उपाययोजना, जनजागृती, मोफत तपासणी, औषध वाटप केले जात आहे.
यासंदर्भात वैद्यकीय अधिकारी डॉक्टर संतोष कांबळे म्हणाले, सध्या हवामानाचा परिणाम मोठ्याप्रमाणात आरोग्यावर होत आहे. ताप, खोकला यासारखे आजार पसरत आहेत. आरोग्य केंद्राद्वारे रूग्णांवर औषधोपचार सुरू आहेत. रुग्णसंख्या दिवसेंदिवस वाढत असली तरीही आजारावर नियंत्रण ठेवण्यासाठी आम्ही प्रयत्न करीत आहोत. आरोग्य केंद्रात आवश्यक औषधसाठा पुरेसा आहे.