सावंतवाडीतील ‘सी.टी. स्कॅन’
सेवा आजपासून तात्पुरती बंद

उपजिल्हा रुग्णालयाची देयके रखडली

सकाळ वृत्तसेवा
सावंतवाडी, ता. १४ ः येथील उपजिल्हा रुग्णालयातील सी.टी.स्कॅन सेवा क्रस्ना डायग्नोस्टिक्सने उद्यापासून (ता. १५) तात्पुरती बंद केली आहे. रुग्णालयातील या सेवेची ७१ लाख ६५ हजार ०२९.६ रुपयांची देयके वरिष्ठ कार्यालयाकडून अद्यापही न मिळाल्याने हा निर्णय घेतला आहे, अशी माहिती वैद्यकीय अधीक्षक डॉ. ज्ञानेश्वर ऐवळे यांना पत्र देऊन कळविली आहे. डॉ. ऐवळे यांनी या पत्राची माहिती जिल्हा शल्य चिकित्सक डॉ. श्रीपाद पाटील यांना दिली आहे.
या गैरसोईमुळे अनेक गरजू रुग्णांचे हाल होणार आहेत. सरकारी रुग्णालयात ही सेवा मोफत उपलब्ध असल्याने सामान्य नागरिकांना मोठा आधार होता. ही सेवा बंद झाल्यामुळे आता रुग्णांना खासगी ठिकाणी जावे लागणार आहे. त्यामुळे त्यांना मोठा आर्थिक भुर्दंड सोसावा लागणार आहे. याआधीही या कंपनीचे देयक थकल्यामुळे सेवा बंद झाल्याच्या घटना घडल्या आहेत. याबाबत स्थानिक नागरिकांनी शासनाच्या कारभारावर संताप व्यक्त केला असून असे प्रकार थांबविण्याची मागणी केली आहे.
दरम्यान, याबाबत विचारण्यासाठी क्रस्ना डायग्नोस्टिक्सला फोन केले असता त्यांनी ते स्वीकारले नाहीत. त्यांच्या वरिष्ठ कार्यालयातूनही प्रतिसाद मिळाला नाही. उपजिल्हा रुग्णालयातील कार्यालय बंद असल्याने संपर्क होऊ शकला नाही. डॉ. ऐवळे यांना विचारले असता, आपणाला याबाबत संबंधितांनी माहिती दिली असून, जिल्हा शल्य चिकित्सकांना याबाबतची माहिती दिली आहे, असे सांगितले.