मंदिराच्या कळसावरून
पडून तरुणाचा मृत्यू
सकाळ वृत्तसेवा
खेड ः तालुक्यातील भरणे येथील श्री देवी काळकाई मंदिराच्या कळसावर स्वच्छतेसाठी चढलेल्या रमेश बाळा फागे (वय ४२, रा. फागेवाडी, भरणे) यांचा तोल जाऊन ते खाली पडल्याने जागीच मृत्यू झाला. ही घटना रविवारी (ता. १४) दुपारी घडली. भरणे येथील श्री देवी काळकाईचा नवरात्रोत्सव काही दिवसांवर येऊन ठेपला आहे. त्यामुळे ग्रामस्थ मंदिर स्वच्छतेचे काम करत होते. रविवारी भरणे-फागेवाडी व जाधववाडी येथील ग्रामस्थांकडे स्वच्छतेचे काम होते. त्या वेळी फागे मंदिराच्या कळसावर स्वच्छतेचे काम करत असताना अचानक त्यांचा पाय घसरला आणि ते खाली पडले. गंभीर अवस्थेत त्यांना तातडीने रुग्णालयात नेण्यात आले; मात्र वैद्यकीय अधिकाऱ्यांनी त्यांना मृत घोषित केले. रात्री आठ वाजता नजीकच्या स्मशानभूमीत अंत्यसंस्कार करण्यात आले. त्यांच्या पश्चात पत्नी, एक मुलगा व एक मुलगी असा परिवार आहे.