विष पिलेल्या
प्रौढाचा मृत्‍यू
कणकवली ः सुरक्षा रक्षकाची नोकरी सुटल्‍याच्या नैराश्‍यातून प्रौढाने विष प्राशन केले. यात जिल्‍हा रुग्णालयात उपचार सुरू असताना त्‍याचा मृत्‍यू झाला. अविनाश नारायण गिरकर (वय ५२, रा.पियाळी) असे मृताचे नाव आहे. ही घटना नांदगाव रेल्‍वे स्थानकात काल (ता.१४) सायंकाळी सहाच्या सुमारास घडली. पोलिसांनी दिलेल्या माहितीनुसार, अविनाश गिरकर हा खासगी सुरक्षा रक्षक कंपनी नोकरीला होता. अलीकडेच त्‍याची नोकरी सुटली होती. या नैराश्‍यातून त्‍याने काल (ता.१४) नांदगाव रेल्‍वे स्थानक गाठले. या स्थानकात त्‍याने सोबत अाणलेले विष प्राशन केले. त्‍याची स्थिती गंभीर झाल्‍याची बाब रेल्‍वे कर्मचाऱ्यांना समजताच, त्‍यांनी रूग्‍णवाहिकेतून कणकवली उपजिल्‍हा रूग्‍णालयात उपचारासाठी पाठवले. तेथे त्‍याची प्रकृती अधिक बिघडल्‍याने त्‍याला ओरोस येथील जिल्‍हा रुग्णालयात पाठविण्यात आले. तेथे उपचार सुरू असताना आज (ता.१५) पहाटे त्‍याचा मृत्‍यू झाला. या घटनेची खबर गिरकर याचे नातेवाईक समीर नारायण तेली यांनी आज कणकवली पोलीस ठाण्यात दिली. त्‍यानुसार आकस्मिक मृत्‍यू अशी नोंद करण्यात आली आहे.