म्‍हशीचे दूध काढल्‍याच्या
रागातून तरुणाला मारहाण

कुंभवडे गावठाणवाडी येथील घटना

कणकवली, ता. १५ ः म्‍हशीचे दूध काढल्‍याच्या रागातून तरूणाला पती आणि पत्‍नीने लाकडी दांड्याने मारहाण केली. ही घटना काल आज (ता.१५) सकाळी सात वाजण्याच्या सुमारास कुंभवडे गावठाणवाडी येथे घडली. याबाबतची फिर्याद अनिल दिनकर सावंत (वय ४७, रा.गावठाणवाडी कुंभवडे) यांनी आज पोलिस ठाण्यात दिली.
फिर्यादीत म्हटले आहे की, कुंभवडेतील अनिल सावंत हे सकाळी सात वाजता दूध डेअरीमध्ये दूध घेऊन जात होते. वाटेत त्‍यांना त्‍याच वाडीतील सुरेश भिकाजी सावंत (वय ५३) आणि त्‍यांची पत्‍नी स्मिता सुरेश सावंत (वय ४९) यांनी त्याला अडवले. आमच्या म्‍हशीचे दूध तू का काढतोस? अशी विचारणा करून शिवीगाळ केली. त्‍यानंतर सोबत आणलेल्‍या लाकडी दांड्याने सुरेश सावंत यांनी अनिल सावंत याच्या नाकावर, उजव्या हातावर मारून जखमी केले. यावेळी सुरेश अणि त्‍याची पत्‍नी स्मिता यांनी शिवीगाळ केली. तसेच ठार मारण्याची धमकी दिली. यानंतर सुरेश याने दूधाची किटली काढून घेऊन त्‍यातून दोन लिटर दूध रस्त्यावर ओतले, अशी फिर्याद अनिल सावंत यांनी दिली. त्‍यानुसार सुरेश आणि स्मिता सावंत या दोहोंवर कणकवली पोलिसांनी गुन्हा दाखल केला आहे. घटनेचा अधिक तपास हवालदार श्री.वेंगुर्लेकर करत आहेत.