सिंधुदुर्गामध्ये शनिवारी
किनारा स्वच्छता मोहीम
सिंधुदुर्गनगरी, ता. १६ ः राष्ट्रीय किनारा अभियान अंतर्गत समुद्रकिनारा स्वच्छता मोहिमेसाठी सिंधुदुर्ग जिल्ह्यातील समुद्र किनाऱ्यांची निवड करण्यात आली आहे. ही मोहीम आंतरराष्ट्रीय स्वच्छता दिनी २० सप्टेंबरला करण्याचे नियोजित आहे. या मोहिमेंतर्गत देवगड तालुक्यातील मिठमुंबरी व मालवण तालुक्यातील आचरा व देवबाग या ठिकाणी स्वच्छता मोहीम राबविण्यात येणार आहे. पर्यटनदृष्ट्या स्वच्छता मोहीम ही सिंधुदुर्ग जिल्ह्यातील सर्व सागरी किनाऱ्यांवर राबविण्यात येणार आहे. या मोहिमेमध्ये संबंधित गटविकास अधिकाऱ्यांनी नगरपालिका, नगरपंचायत विभागांच्या सहकार्याने संबंधित ग्रामपंचायत, माध्यमिक विद्यालय, उच्च माध्यमिक विभाग तसेच सामाजिक संस्था तसेच स्थानिक लोकसहभागातून स्वच्छता मोहीम राबविण्याचे आवाहन उपजिल्हाधिकारी बालाजी शेवाळे यांनी केले आहे.