91976

वर्षभरातच २७ लाखांचा रस्ता उद्ध्वस्त

कासार्डे दाबगाव मार्ग; ग्रामस्थांकडून निकृष्ट कामाचा आरोप

सकाळ वृत्तसेवा
तळेरे, ता. १६ : कासार्डे दाबगाव पावसकरवाडी ते खांडसरी ग्रामीण मार्ग क्रमांक ८६ रस्त्याचे काम निकृष्ट झाले आहे. सुमारे २७ लाखांचे काम करून फक्त एक वर्ष पूर्ण झाले असताना वाळूच्या अवजड वाहतुकीमुळे रस्त्याची दुरवस्था झाली आहे, असा आरोप करत नागरिकांसह शेतकरीवर्गाची गैरसोय होत असल्याने हा रस्ता पुन्हा नव्याने करावा, अशी मागणी केली आहे. याबाबत तत्काळ कार्यवाही न झाल्यास आंदोलनाचा इशारा ग्रामस्थांनी दिला आहे.
कासार्डे गावातील अनेक जिल्हा व गावअंतर्गत रस्त्यांची मायनिंगच्या अवजड वाहतुकीमुळे दयनीय अवस्था झाली असून, याकडे स्थानिक लोकप्रतिनिधींसह अधिकारीवर्गाचे दुर्लक्ष होत आहे. सध्या तळेरे, कासार्डे, पियाळीमार्गे फोंडाघाट, गडमठमार्गे फोंडाघाट व पंतप्रधान सडक योजनेतील कासार्डे-देऊलकरवाडी रस्ताही वाहनचालक व नागरिकांना त्रासदायक ठरत आहे. पालकमंत्री आराखड्यातून पावसकरवाडी लोकवस्तीमधील अनेक वर्षांच्या मागणीनंतर एका वर्षापूर्वी झालेल्या या रस्त्याची दैनावस्था झाली आहे.
------
डागडुजी करा; अन्यथा आंदोलन!
या भागात उसाची लागवड जास्त प्रमाणात आहे. रस्त्यावर पडलेल्या खड्ड्यांमुळे ऊस वाहतूक होणार नाही. रस्त्याच्या आजूबाजूला मायनिंग वॉशिंग प्लांट व गोडाऊन असल्याने या रस्त्याने वाळू वाहतूक जास्त प्रमाणात केली जाते. त्यामुळे या रस्त्याची दयनीय अवस्था झाली आहे, असा आरोप ग्रामस्थांनी केला आहे. या रस्त्याची त्वरित डागडुजी करावी; अन्यथा आंदोलन करण्याचा इशारा गणेश नारकर, संदीप पावसकर, गणपत कुडतरकर, देवानंद कुडतरकर, सदाशिव बोभाटे, अजित पावसकर, संतोष घनदाडे, सुरेश कुडतरकर, दिलीप पावसकर, सत्यवान पावसकर यांनी दिला आहे.