अपघात प्रकरणी
ट्रकचालकावर गुन्हा
रत्नागिरी ः मुंबई ते गोवा महामार्गावरील हातखंबा येथील देसाई हायस्कूलसमोरील उताराच्या रस्त्यावर निष्काळजीपणे ट्रक चालवून भीषण अपघात करणाऱ्या त्या संशयित चालकाविरुद्ध ग्रामीण पोलिस ठाण्यात गुन्हा दाखल करण्यात आला आहे. विजय शिवयोगी मडीवालार (वय २३, रा. कोडलीवाड, बेळगाव, रा. कर्नाटक) असे संशयित चालकाचे नाव आहे. ही घटना बुधवारी (ता. १७) सायंकाळी घडली. पोलिसांकडून मिळालेल्या माहितीनुसार, मुंबई ते गोवा जाणाऱ्या राष्ट्रीय महामार्गावरून संशयित चालक विजय मडीवालार हा ट्रक घेऊन जात असताना ट्रक हातखंबा तिठा ते हातखंबा गावात जाणाऱ्या रस्त्यावरील देसाई हायस्कूल उतारात निष्काळजीपणे चालवून भीषण अपघात केला. या प्रकरणी पोलिस पाटील शर्वरी सनगरे यांनी ग्रामीण पोलिस ठाण्यात तक्रार दिली. तक्रारीवरून पोलिसांनी संशयित ट्रकचालकाविरुद्ध गुन्हा दाखल केला आहे.

जनावरांना धडक
देणाऱ्या चालकावर गुन्हा
रत्नागिरी ः मुंबई-गोवा महामार्गवर हातखंबा रस्त्यावर निष्काळजीपणे वाहन चालवून चालकाने बैल व गाईला धडक दिली. या धडकेत जनावरांचा मृत्यू झाला. या प्रकरणी ग्रामीण पोलिस ठाण्यात संशयित चालकाविरुद्ध गुन्हा दाखल करण्यात आला आहे. मुन्ना चेंदीराम प्रसाद (वय ५०, रा. निवासी बलीया, ता. रसडा, रा. उत्तरप्रदेश) असे संशयित चालकाचे नाव आहे. ही घटना मंगळवारी (ता.१६) रात्री मुंबई-गोवा महामार्गावर हातखंबा येथील ईश्वर ढाबा येथे घडली. पोलिसांकडून मिळालेल्या माहितीनुसार, संशयित चालकाने ट्रक हातखंबा रस्त्यावर निष्काळजीपणे चालवून सहा वर्षाच्या बैलाला आणि १० वर्षाच्या गायीला धडक दिली. या प्रकरणी संकेत देसाई यांनी ग्रामीण पोलिस ठाण्यात तक्रार दिली. तक्रारीवरून पोलिसांनी संशयित चालकाविरुद्ध गुन्हा दाखल केला आहे.

अमली पदार्थाचे सेवन
करणाऱ्यांवर गुन्हा
रत्नागिरी ः अर्धवट बांधकाम असलेल्या इमारतीच्या आडोशाला गांजाचे सेवन करणाऱ्या दोन तरुणांविरुद्ध शहर पोलिस ठाण्यात गुन्हा दाखल करण्यात आला आहे. बिपलप अमुल्य हालदार (वय २७, रा. यशोधन अपार्टमेंट, पॉवरहाऊस, रत्नागिरी) व बाबू निपेन हालदार (वय ३७, रा. यशोधन अपार्टमेंट, पॉवरहाऊस, रत्नागिरी) अशी संशयितांची नावे आहेत. ही घटना बुधवारी (ता. १७) दुपारी थिबापॅलेस रोडवरील एका डेअरीच्या बांधकाम सुरू असलेल्या इमारतीच्या गडग्याच्या आडोशाला घडली. पोलिसांकडून मिळालेल्या माहितीनुसार, संशयित गांजासदृश अमली पदार्थांचे सेवन करत असताना निदर्शनास आले. या प्रकरणी पोलिस हवालदार कल्लापा पाटील यांनी शहर पोलिस ठाण्यात तक्रार दिली.

सार्वजनिक ठिकाणी
मद्य पिणाऱ्यांवर गुन्हा
रत्नागिरी ः शहरीतील साळवीस्टॉप-जलतरण तलाव येथील सार्वजनिक ठिकाणी मद्य पिणाऱ्या दोघा तरुणांविरुद्ध शहर पोलिस ठाण्यात गुन्हा दाखल करण्यात आला आहे. अनिल फौजदार गुप्ता व बिपलप शंकर हलदार अशी संशयित तरुणांची नावे आहेत. या घटना बुधवारी (ता. १७) सायंकाळी साळवीस्टॉप येथील जलतरण तलावाकडे जाणाऱ्या सार्वजनिक रस्त्यावर निदर्शनास आली. या प्रकरणी पोलिस हवालदार प्रशांत पाटील व आशिष भालेकर यांनी शहर पोलिस ठाण्यात तक्रार दिली.