रत्नागिरी एमआयडीसीत
वेश्या व्यवसायाचा अड्डा
नेपाळी महिलेला अटक : दोन पीडित महिलांची सुटका
सकाळ वृत्तसेवा
रत्नागिरी, ता. १८ : रत्नागिरी एमआयडीसीमध्ये आणखी एक वेश्या व्यवसायाचा अड्डा उघड झाला. स्थानिक गुन्हे शाखेने बनावट ग्राहक पाठवून हा देहविक्रयाचा प्रकार आज उघड केला. देहविक्रयाच्या या व्यवसायातून पुणे येथील दोन पीडित महिलांची पोलिसांनी सुटका केली असून, व्यवसाय करणाऱ्या नेपाळी महिलेला ताब्यात घेतले.
याबाबत पोलिसांनी दिलेली माहिती अशी, शहराजवळील एमआयडीसी-मिरजोळे, रत्नागिरी येथे अनैतिक व्यापार सुरू असल्याची गोपनीय माहिती पोलिसांना मिळाली होती. त्याआधारे सापळा रचला. पोलिसांनी एमआयडीसी प्लॉट नं. ई - ६९, मिरजोळे येथे एक बनावट ग्राहक पाठवून पोलिसांनी छापा टाकला. त्यावेळी एक नेपाळी महिला पुणे येथील दोन महिलांकडून देहविक्रयाचा व्यवसाय करत असल्याचे उघड झाले. त्यांच्यावर ग्रामीण पोलिस ठाण्यात गुन्हा दाखल केला असून, या दोन महिलांची स्थानिक गुन्हे शाखेच्या पथकाकडून देहविक्रयाच्या व्यवसायातून मुक्तता केली. हा व्यवसाय करून घेणाऱ्या आणि पुण्यावरून महिलांना आणणाऱ्या नेपाळी महिलेला अटक केली आहे. अटक केलेली नेपाळी महिला हे संपूर्ण रॅकेट चालवत असल्याचे उघड झाले आहे. ही महिला पुण्यातील दोन तरुणींना फूस लावून रत्नागिरी येथे आणत होती आणि त्यांचा वेश्या व्यवसायासाठी वापर करत असल्याचे निष्पन्न झाले आहे.
ही कारवाई जिल्हा पोलिस अधीक्षक नितीन बगाटे व अपर पोलिस अधीक्षक बी. बी. महामुनी यांच्या मार्गदर्शनाखाली स्थानिक गुन्हे शाखेचे पोलिस निरीक्षक नितीन ढेरे व सहायक पोलिस निरीक्षक शबनम मुजावर, पोलिस उपनिरीक्षक संदीप ओगले, हवालदार विजय आंबेकर, दीपराज पाटील, विवेक रसाळ, भैरवनाथ सवाईराम, स्वाती राणे, शीतल कांबळे, पाटील, नाईक दत्ता कांबळे आदी पोलिस अधिकारी व अंमलदार यांनी केली. काही दिवसांपूर्वी कारवांचीवाडी येथील एका हॉटेलमध्ये अशा प्रकारचा वेश्या व्यवसायाचा प्रकार उघड झाला होता. यामध्ये परराज्यातील मुलींची पोलिसांनी सुटका केली होती.