92875

जीएसटी कपातीमुळे रोजगाराच्या संधी

अवधूत वाघ ः भाजपच्या धोरणांची दिली माहिती

सकाळ वृत्तसेवा
कुडाळ, ता. २० ः जीएसटी दरकपात हा सर्वसामान्य माणसाच्या समृद्धीचा महामार्ग आहे. यामुळे जीवनशैलीला देखील नवी चालना मिळेल. केंद्राने वस्तू व सेवा कराच्या रचनेमध्ये केलेली ही देशातील आतापर्यंतची सर्वांत मोठी व सर्वांना लाभ मिळवून देणारी सुधारणा अंमलात येईल, तेव्हा देशाच्या अर्थव्यवस्थेला चालना मिळेल, व्यापार क्षेत्राला मोठा लाभ होईल. मागणी व उत्पादन वाढणार असल्याने रोजगाराच्या नव्या संधी निर्माण होऊन कुटुंबांच्या आर्थिक संपन्नतेची नवी सुरुवात होईल, असा विश्वास पत्रकार परिषदेत भाजपाचे प्रवक्ते अवधूत वाघ यांनी व्यक्त केला.
श्री. वाघ यांनी एमआयडीसी विश्रामगृहावर पत्रकार परिषद घेतली. यावेळी बंड्या सावंत, बाळू देसाई, सुधीर झाडये, संजय वेंगुर्लेकर, राजू राऊळ, मोहन सावंत, सुनील बांदेकर उपस्थित होते. श्री. वाघ म्हणाले, ‘‘भारताच्या अमृतकाळात सामान्य माणसाची जीवनशैली सुखी आणि संपन्न करण्यासाठी केंद्रीय वस्तू आणि सेवा करांच्या दराची पुनर्रचना व अधिक सुसूत्रीकरण करण्याचा पंतप्रधान नरेंद्र मोदी यांनी ७९ व्या स्वातंत्र्य दिनी लाल किल्ल्यावरून जाहीर केलेला संकल्प आता प्रत्यक्षात आला आहे. देशाच्या अर्थव्यवस्थेसह जनतेच्या सामान्य माणसाचे जीवनमान सुलभ करणे आणि अर्थव्यवस्थेला अधिक मजबुती देणे, हा जीएसटी कर प्रणालीच्या नव्या रचनेचा हेतू असेल, असे पंतप्रधानांनी लाल किल्ल्यावरून जाहीर केले होते. केंद्र आणि राज्याचा समावेश असलेल्या जीएसटी परिषदेने जीएसटी सुधारणांचा नवा प्रस्ताव एकमताने संमत करून पंतप्रधानांच्या संकल्पास बळ दिले आहे. सामान्य माणूस, शेतकरी, मध्यम व लघू उद्योगक्षेत्र, मध्यमवर्गीय समाजघटक, महिला आणि युवावर्गास या सुधारणांमुळे होणाऱ्या नव्या अर्थनीतीचा लाभ होईल आणि व्यावसायिकांना व्यवसाय सुलभतेचा अपूर्व आनंद उपभोगता येईल. ’’
......................
मोदी सरकारकडून विकासाचे राजकारण
राज्यात सरकार कोणाचेही असले तरी जीएसटी दर कपातीमुळे प्रत्येक राज्यातील जनतेला, प्रत्येक कुटुंबाला, गरिबांना आणि मध्यमवर्गीयांना, लहानमोठ्या उद्योजकांना, प्रत्येक व्यापाऱ्याला आणि व्यावसायिकांना मोठा फायदा होणार आहे. प्रत्येक मुद्याला राजकीय रंग देण्याची घाणेरडी सवय काँग्रेसला लागली आहे. त्यांचे हीन दर्जाचे राजकारण त्यांना लखलाभ. मोदी सरकार मात्र सर्व वर्गातील जनतेचे भले करण्यासाठी विकासाचे राजकारण करत राहील, असे श्री. वाघ यांनी स्पष्ट केले.