टॅरिफ वॉरचा कोकणातील मत्स्योद्योगाला फटका
मासळी दरात ५० टक्क्यांनी वाढ; निर्यात ४० टक्क्यांनी घटल्याने निर्यातदार संकटात
सकाळ वृत्तसेवा
रत्नागिरी, ता. २१ : अमेरिकेचे राष्ट्राध्यक्ष डोनाल्ड ट्रम्प यांनी भारतावर लादलेल्या वाढीव टॅरिफमुळे (आयात शुल्क) कोकणातील पारंपरिक मत्स्यनिर्यात उद्योगाला मोठा फटका बसला आहे. या ‘टॅरिफ वॉर’मुळे मासळीचे दर जवळपास ५० टक्क्यांनी वाढले आहेत. त्याचा थेट परिणाम मत्स्यनिर्यातीवर होऊन निर्यात ४० टक्क्यांनी घटली आहे. यामुळे स्थानिक निर्यातदार आणि मासेमारी व्यवसाय दोन्ही धोक्यात आले आहेत.
अमेरिकेत मासे निर्यात करणाऱ्या मिरजोळे येथील जिलानी मरिन प्रॉडक्ट कंपनीचे व्यवस्थापक अब्दुल निसार यांनी या परिस्थितीला दुजोरा दिला. या वाढीव टॅरिफमुळे अमेरिकेत निर्यात होणाऱ्या माशांच्या किमती ५० टक्क्यांनी वाढल्या आहेत. या दरवाढीचा थेट फटका अमेरिकेतील ग्राहकांना बसत असल्यामुळे माशांची मागणी मोठ्या प्रमाणात घटली आहे. या वाढलेल्या शुल्काचा बोजा कोणी उचलायचा यावरून निर्यातदार आणि अमेरिकेतील खरेदीदार यांच्यात वाद सुरू आहे. एकीकडे निर्यातदारांना हा भार सोसणे परवडणारे नाही तर दुसरीकडे खरेदीदार वाढीव किमतीमुळे ग्राहकांकडून मागणी घटल्याने अडचणीत आले आहेत.
फिश पेस्ट आणि विविध मत्स्यपदार्थ तयार करणारी भारतातील पहिली कंपनी असलेल्या रत्नागिरीच्या गद्रे मरिनलाही या टॅरिफचा फटका बसला आहे. कंपनीने व्यक्त केलेल्या भितीनुसार, या वाढीव शुल्काचा परिणाम त्यांच्या सध्याच्या ऑर्डर्सवर होण्याची शक्यता आहे. या युद्धामुळे माशांचे दर वाढले असून, मागणी घटली आहे. त्यामुळे स्थानिक मासेमारांच्या रोजगारावरही परिणाम होण्याची शक्यता आहे. सद्यःपरिस्थिती पाहता लवकरच यावर समाधानकारक तोडगा काढणे आवश्यक आहे अन्यथा कोकणातील मत्स्यनिर्यात उद्योगासाठी हे मोठे संकट होऊ शकते.

कोट
नव्या टॅरिफमुळे अमेरिकेतील ग्राहकांनाही त्रास होत आहे. तिथल्या नागरिकांचा त्यांच्या सरकारवर दबाव वाढत आहे. त्यामुळे, पुढील तीन महिन्यांत यावर काहीतरी तोडगा निघेल, अशी आम्हाला आशा आहे.
- दीपक गद्रे, संचालक, गद्रे मरीन कंपनी