रत्नागिरी, सिंधुदुर्गातील
सात अभियंत्यांचा गौरव
रत्नागिरी, ता. २२ : सार्वजनिक बांधकाम विभागाने रस्ते, पूल आणि शासकीय इमारतींच्या बांधकामात उत्कृष्ट कामगिरी करणाऱ्या राज्यातील अधिकारी व कर्मचाऱ्यांचा गौरव होणार आहे. भारतरत्न सर विश्वेश्वरैय्या यांच्या जयंतीनिमित्त १५ सप्टेंबरला अभियंता दिन’ साजरा केला जातो. या निमित्ताने २०२४-२५ या कालावधीतील उल्लेखनीय काम करणाऱ्या अधिकारी, कर्मचाऱ्यांना सन्मानचिन्ह व प्रशस्तीपत्र देऊन सन्मानित करण्यात येणार आहे. यामध्ये कोकण विभागातील रत्नागिरी आणि सिंधुदुर्ग जिल्ह्यांमधील एकूण ७ अभियंत्यांचा समावेश आहे.
या गौरव समारंभाचे आयोजन २४ सप्टेंबरला सकाळी ११ वाजता मुंबईतील रवींद्र नाट्यमंदिर, प्रभादेवी येथे केले आहे. रत्नागिरी जिल्ह्यातून शाखा अभियंता अभिजित पाटील आणि उपविभागीय अभियंता महेश वास्ते यांचा विशेष गौरव करण्यात येणार आहे. त्यांच्यासोबतच सिंधुदुर्ग जिल्ह्यातील कार्यकारी अभियंता महेंद्र किणी, उपअभियंता अजित पाटील, कनिष्ठ अभियंता शुभम दुड्ये आणि सूरज गिरी तसेच स्थापत्य अभियांत्रिकी सहाय्यक समाधान खैरनार यांचाही सन्मान होणार आहे.
या सर्व अधिकारी आणि कर्मचाऱ्यांनी आपापल्या कार्यक्षेत्रात दाखवलेल्या तांत्रिक व अतांत्रिक कौशल्यामुळे अनेक महत्त्वाचे सार्वजनिक प्रकल्प यशस्वीरित्या पूर्ण झाले, ज्याचा फायदा समाजाला भविष्यात होत राहील. त्यांच्या या योगदानाने विभागाच्या कामाला आणखी गती मिळेल, अशी अपेक्षा व्यक्त केली जात आहे.