`वालावलकर’मध्ये गर्भाशय शस्त्रक्रिया
सकाळ वृत्तसेवा
सावर्डे, ता. २६ : ‘निरोगी आई-निरोगी समाजाची पायाभरणी’ या ध्येयाने प्रेरित होऊन वालावलकर रुग्णालय व रोगनिदान केंद्र सावर्डे (ता. चिपळूण, जि. रत्नागिरी) येथील प्रसूती व स्त्रीरोग शास्त्र विभागामार्फत विशेष महिला आरोग्य शिबिराचे आयोजन करण्यात आले आहे. या शिबिरात दुर्बिणीद्वारे तसेच टाक्याच्या गर्भाशय शस्त्रक्रिया तज्ज्ञ डॉक्टरांकडून अत्यल्प दरात केल्या जाणार आहेत. पिवळे व केशरी रेशनकार्डधारक रुग्णांना ही सुविधा अत्यंत कमी खर्चात उपलब्ध करून देण्यात आली आहे. या शिबिराचा लाभ घेऊन अनेक महिलांना दीर्घकाळ चालणाऱ्या त्रासांपासून मुक्ती मिळू शकते. अंग बाहेर येणे, गर्भाशयाच्या गाठी, पाळीच्यावेळी होणारा अतिरक्तस्राव, अंडाशयाच्या गाठी तसेच पीसीओडीसारख्या स्त्रीरोगांवर या शिबिरात तज्ज्ञांकडून संपूर्ण तपासणी व गरजेनुसार शस्त्रक्रिया केली जाणार आहे. या शिबिरात सहभागी होण्यासाठी २९ रोजी महिलांनी रुग्णालयाशी संपर्क साधावा, असे आवाहन रुग्णालय प्रशासनाकडून करण्यात आले आहे.