शहीद जवानांच्या वारसांना
जमीनवाटपाबाबत सूचना
सकाळ वृत्तसेवा
पावस, ता. २९ ः युद्धात किंवा युद्धजन्य परिस्थितीत किंवा कोणत्याही लष्करी कार्यवाहीमध्ये वीरमरण आलेल्या राज्याचे अधिवासी असणाऱ्या शहीद जवानांच्या पत्नी/अवलंबितांना शेतीयोग्य जमीनवाटपासंबंधी त्यांच्या प्रलंबित प्रकरणांबाबत रत्नागिरीतील जिल्हाधिकारी कार्यालयात जिल्हाधिकारी एम. देवेंदर सिंह यांच्या अध्यक्षतेखाली बैठक झाली.
बैठकीला एअर मार्शल एच. एन. भागवत, निवासी उपजिल्हाधिकारी चंद्रकांत सूर्यवंशी, तहसीलदार राजाराम म्हात्रे, सहाय्यक जिल्हा सैनिक कल्याण अधिकारी विद्याधार ताटे, नायब महसूल अधिकारी भिसे, माजी सैनिक प्रफुल्ल रेडीज, तुषार हरवडे तसेच वीरनारी, वीरमाता, वीरपिता व अवलंबित उपस्थित होते. दूरदृष्य प्रणालीद्वारे जिल्हाधिकारी सिंह यांनी संबंधित महसूल अधिकाऱ्यांना अहवाल ताबडतोब सादर करण्याबाबत सूचना दिल्या व सर्व प्रकरणे सेवा पंधरवडामध्ये निकाली काढण्याबाबत सांगितले.