कुडाळ राऊळ महाविद्यालयात
उद्यापासून बॅडमिंटन स्पर्धा
कुडाळ, ता. २८ ः कोकण विभागातील युवक क्रीडापटूंना संधी आणि प्रोत्साहन मिळावे, या उद्देशाने मुंबई विद्यापीठाच्या कोकण विभागीय (विभाग ४) आंतरमहाविद्यालयीन पुरुष व महिला बॅडमिंटन स्पर्धेचे यजमानपद येथील संत राऊळ महाराज महाविद्यालयाला प्राप्त झाले आहे. ही स्पर्धा ३० सप्टेंबर आणि १ ऑक्टोबरला महाविद्यालयाच्या बॅडमिंटन कोर्टवर होणार आहे.
कोकण विभागातून या स्पर्धेत १६६ स्पर्धक सहभागी झाले आहेत, अशी माहिती कोकण विभाग क्रीडा समिती सचिव प्रा. चंद्रकांत नाईक व संत राऊळ महाराज महाविद्यालयाचे प्रभारी प्राचार्य डॉ. अनंत लोखंडे यांनी दिली. संत राऊळ महाराज महाविद्यालयात पत्रकार परिषदेचे आयोजन करण्यात आले होते. यावेळी प्रा. लोखंडे, प्रा. नाईक यांच्यासह संत राऊळ महाराज महाविद्यालय क्रीडा विभाग प्रमुख डॉ. प्रकाश मसुरकर, समिती सदस्य प्रा. अजित कानशिडे, प्रा. एस. एस. चव्हाण, प्रा. आर. के. सावंत, प्रा. गीताश्री ठाकूर, प्रा. काजल मातोंडकर, क्रीडा प्रशिक्षक क्रिस्टन रॉड्रिग्ज उपस्थित होते. या स्पर्धेत सिंधुदुर्ग, रत्नागिरी आणि रायगड जिल्ह्यांतील एकूण ३३ महाविद्यालयांचे १६६ स्पर्धक सहभागी झाली आहेत. त्यामध्ये १०६ मुलगे व ६० मुली आहेत. सोमवारी (ता. २९) सायंकाळी या स्पर्धकांची नोंदणी होऊन लॉट्स टाकण्यात येणार आहेत. मंगळवारी (ता. ३०) सकाळी १० वाजता या स्पर्धेचे उद्घाटन तर बुधवारी (ता. १) सांगता होणार आहे.