चिपळूण पालिकेवर ठाकरे शिवसेनेचा भगवा
पदाधिकाऱ्यांचा संकल्प ; उपशहरप्रमुख, शहर विभागप्रमुखांची बैठक
सकाळ वृत्तसेवा
चिपळूण, ता. ५ ः शिवसेनेचा भगवा चिपळूण पालिकेवर फडकविण्याचा संकल्प उद्धव बाळासाहेब ठाकरे शिवसेनेच्या प्रमुख पदाधिकाऱ्यांच्या बैठकीत करण्यात आला.
चिपळूणमधील उपशहरप्रमुख व शहर विभागप्रमुखांची तातडीची बैठक प्राथमिक शिक्षक पतपेढीच्या सभागृहात झाली. या बैठकीचे आयोजन चिपळूण शहर प्रमुख सचिन उर्फ भैया कदम यांनी केले होते. ही बैठक विधानसभा क्षेत्रप्रमुख बाळा कदम आणि तालुका समन्वयक राजू देवळेकर यांच्या प्रमुख उपस्थितीत पार पडली. या बैठकीत शहरातील पक्ष संघटन आणि आगामी चिपळूण पालिका निवडणुकीच्या पार्श्वभूमीवर रणनिती ठरविण्याबाबत सविस्तर चर्चा झाली. पदाधिकाऱ्यांना काही महत्त्वाच्या सूचना देण्यात आल्या. तसेच सर्वानुमते एकजुटीने शिवसेनेचा भगवा चिपळूण पालिकेवर फडकविण्याचा संकल्प करण्यात आला. सचिन कदम यांनी बैठकीचे प्रास्ताविक केले, तर बाळा कदम व राजू देवळेकर यांनी पदाधिकाऱ्यांना मार्गदर्शन केले. शहरातील सर्व उपशहर प्रमुख आणि विभाग प्रमुखांच्या उपस्थितीत ही बैठक उत्साहात व खेळीमेळीच्या वातावरणात पार पडली.