तालुकास्तरीय शाळेय क्रीडा स्पर्धेत
हातिवले विद्यालयाचे सुयश
राजापूर, ता. ५ ः हातिवले येथे झालेल्या तालुकास्तरीय शालेय क्रीडा स्पर्धेमध्ये दवाचेगोठणे येथील बा. ल. साठे माध्यमिक विद्यालयातील विद्यार्थिनींनी घवघवीत यश मिळविले. त्यामध्ये तब्बल सात क्रीडा प्रकारामध्ये प्रशाळेच्या खेळाडूंची डेरवण येथे होणाऱ्या जिल्हास्तरीय क्रीडा स्पर्धेसाठी निवड झाली आहे.
१७ वर्षे वयोगटातील मुलांच्या गटातून दुर्गेश संजय नाटेकर याने उंचउडी व लांबउडीमध्ये तालुकास्तरावर प्रथम क्रमांक मिळवला आहे. याच गटातून आनंद नरेंद्र शेलारने हातोडाफेक स्पर्धेत प्रथम व गोळाफेकमध्ये द्वितीय क्रमांक पटकाविला. या दोन्ही खेळाडूंची जिल्हास्तरीय स्पर्धेसाठी निवड झाली आहे. निहार नितीन नवाळेने ४०० मीटर धावणेच्या स्पर्धेत तृतीय क्रमांक पटकाविला. १९ वर्षे वयोगटातील मुलांच्या गटातून तनिष्क भिकाजी मल्हारने उंचउडी क्रीडा प्रकारात तालुकास्तरावर द्वितीय क्रमांक पटकाविला असून त्याची जिल्हा स्पर्धेसाठी निवड झाली आहे.
तनिष्कने ४०० मीटर धावणे स्पर्धेमध्ये तृतीय क्रमांक पटकाविला. मुलींच्या गटातून स्नेहा सुरेश मेस्त्री हिने लांबउडीत तालुकास्तरावर द्वितीय क्रमांक पटकावून जिल्हास्तरीय स्पर्धेसाठी पात्रता मिळविली आहे. त्याचवेळी तिने गोळाफेक स्पर्धेत तृतीय क्रमांक पटकाविला. १४ वर्षे वयोगटातील मुलांच्या गटातून पियुष तुळशीदास गुरव या विद्यार्थ्याने १०० मीटर धावणेच्या स्पर्धेत तालुकास्तरावर द्वितीय क्रमांक पटकावून जिल्हास्पर्धेसाठी पात्रता मिळविली आहे.