रोजगारक्षम अभ्यासक्रमांचे
उद्या होणार उद्‍घाटन
रत्नागिरी ः उद्योग 4.0 युगामध्ये आधुनिक तंत्रज्ञान व सेवाक्षेत्राशी सुसंगत प्रशिक्षण देऊन औद्योगिक क्षेत्राला आवश्यक कुशल मनुष्यबळ पुरवण्यासाठी राज्यातील सर्व शासकीय औद्योगिक प्रशिक्षण संस्थांमध्ये रोजगारक्षम अल्पमुदतीचे अभ्यासक्रम सुरू करण्यात येत आहे. या पार्श्वभूमीवर पंतप्रधान नरेंद्र मोदी यांच्या हस्ते ८ला दुपारी ३ वाजता सर्व शासकीय औद्योगिक प्रशिक्षण संस्थांच्या या नव्या अभ्यासक्रमांचे ऑनलाइन उद्घाटन होणार आहे. रत्नागिरीतील शासकीय औद्योगिक प्रशिक्षण संस्थेत या कार्यक्रमाचे थेट प्रक्षेपण दाखवण्यात येणार आहे. अल्पमुदतीच्या अभ्यासक्रमांचा प्रचार व प्रसार होण्याकरिता जिल्ह्यातील विविध कार्यालयामार्फत औद्योगिक आस्थापना, औद्योगिक संघटना, लाडकी बहीण योजनाचे लाभार्थी, पीएम विश्वकर्मा योजनेचे लाभार्थी, आचार्य चाणक्य कौशल्य विकास केंद्र, प्रमोद महाजन ग्रामीण कौशल्य विकास कार्यक्रम योजनेचे लाभार्थी, द्विलक्षी अभ्यासक्रमाचे लाभार्थी यांना निमंत्रित केले आहे. या वेळी सर्वांनी उपस्थित राहावे, असे आवाहन प्राचार्य शशिकांत कोतवडेकर यांनी केले आहे.

आधुनिक तंत्रज्ञानावर अभ्यासक्रम
रत्नागिरी ः व्यावसायिक शिक्षण पूर्ण करून त्वरित रोजगार स्वयंरोजगार अथवा उच्च शिक्षणाच्या संधी प्राप्त होण्यासाठी रत्नागिरीतील राणी लक्ष्मीबाई शासकीय औद्योगिक प्रशिक्षण संस्थेत प्रवेश घ्यावे, असे आवाहन औद्योगिक प्रशिक्षण संस्थेच्या (मुलींची) प्राचार्याने केली आहे. कौशल्य विकास रोजगार, उद्योजकता व नावीन्यता विभाग, महाराष्ट्र राज्य संचालनालयामार्फत आधुनिक तंत्रज्ञानावर आधारित अल्पमुदत अभ्यासक्रमाच्या प्रथम तुकडीचे उद्‍घाटन बुधवारी (ता. ८) दुपारी ३ वाजता प्रधानमंत्री नरेंद्र मोदी यांच्या हस्ते आभासी पद्धतीने होणार आहे.

संगमेश्वर आयटीआयमध्ये प्रवेश
रत्नागिरी ः संगमेश्वर येथील शासकीय औद्योगिक प्रशिक्षण संस्थेत असोसिएट इलेक्ट्रिशियन (वीजतंत्री), सुईंग मशिन, ऑपरेटर (टेलरिंग), प्लंबर जनरल (नळ कारागीर), फोर व्हीलर सर्व्हिस असिस्टंट (चारचाकी वाहन दुरुस्ती) हे रोजगाराभिमुख अल्पमुदत अभ्यासक्रम अल्प फी आकारून चालू करण्यात येत आहेत. तरी या सुवर्णसंधीचा फायदा घ्यावा, असे आवाहन करण्यात आले आहे. प्रवेशासाठी https://admission.dvet.gov.in या संकेतस्थळावर स्वतंत्र टॅब उपलब्ध करून दिला आहे. राज्यातील ४००पेक्षा अधिक शासकीय औद्योगिक प्रशिक्षण संस्थांमध्ये अल्पकालीन अभ्यासक्रमांच्या पहिल्या तुकडीचे उद्‍घाटन ऑनलाइन पद्धतीने बुधवारी (ता. ८) ऑक्टोबरला होणार आहे.