96910

सावंतवाडीत शिंदे शिवसेनेचा
नगराध्यक्ष हवा ः केसरकर

महायुतीच्या बैठकीत विषय मांडणार

सकाळ वृत्तसेवा
सावंतवाडी, ता. ६ ः आगामी सावंतवाडी नगरपरिषद निवडणुकीच्या पार्श्वभूमीवर शिंदे शिवसेनेने नगराध्यक्ष पदावर दावा केला आहे. आमचा नगराध्यक्ष असावा, अशी आमची भूमिका आहे. महायुतीच्या बैठकीत हा विषय मांडणार असून महायुतीतून पद शिंदे शिवसेनेला सोडावे, अशी मागणी करणार असल्याचे माजी मंत्री, आमदार दीपक केसरकर यांनी आज येथे सांगितले.
आमदार केसरकर म्हणाले, ‘‘सावंतवाडी ही एकमेव नगरपरिषद आहे. जिथे आरक्षण नसतानाही महिला नगराध्यक्षा राहिल्या आहेत. शिंदे शिवसेनेत अनेक सक्षम उमेदवार असून महायुतीमध्ये जागावाटपाची बोलणी सुरू आहे. माजी नगराध्यक्ष संजू परब हे शिंदे शिवसेनेसोबत आहेत. तसेच गेली अनेक वर्षे सावंतवाडी शहराचा पाठिंबा आम्हाला राहिला आहे. त्यामुळे नगराध्यक्ष पद शिंदे शिवसेनेकडेच राहावे, अशी मागणी महायुतीच्या बैठकीत करणार आहे.’’ यावेळी जिल्हाप्रमुख संजू परब उपस्थित होते. दरम्यान, महायुतीतून शिवसेनेला नगराध्यक्ष पद सोडावे, अशी भूमिका केसरकर यांची असल्याने आता महायुतीमध्ये नगराध्यक्ष पदासाठी काय निर्णय घेतला जातो? याकडे सर्वांचे लक्ष लागले आहे.