आकाश नीरभ्र झाल्याने
शेतकरी राजा सुखावला

दिवाळीपूर्वी भात कापणीची लगबग

कणकवली, ता. १२ ः तालुक्यात पावसाने विश्रांती घेतली आहे. गेल्या काही दिवसांपासून परतीच्या पावसाने धुमाकूळ घातला होता. मात्र, दोन दिवसांपासून सूर्यदर्शन होऊ लागले आहे. आकाशही नीरभ्र आहे. त्यामुळे शेतकरी भात कापणीच्या कामाला सुरुवात करीत आहेत.
बहुतांश ठिकाणी भात पीक तयार झाले आहे. पावसाने विश्रांती घेतली असली तरी सखल भागांमध्ये अद्यापही पाणी आहे. त्यामुळे भरडी शेती कापण्यासाठी शेतकऱ्यांनी कामाला सुरुवात केली आहे. या वर्षी १५ मेच्या सुमारास पावसाचे आगमन झाले. त्यामुळे भातशेतीची कामेही मे महिन्यात सुरू झाली. पेरणीनंतर बहुतांश पिकाला १२० ते १३० दिवसांचा कालावधी उलटला आहे. शेतकऱ्यांकडे संकरित आणि सुधारित बियाणे असल्याने १२० दिवसांपासून भात पीक तयार होत आहे. सखल भागात पाणी असले तरी पीक तयार झाले आहे. त्यामुळे पावसाने अशाच पद्धतीने विश्रांती घेतली तर शेतकऱ्यांना भात कापणीची कामे लवकर उरकता येणार आहेत. दिवाळीला काही दिवस शिल्लक असल्याने शेतकरी भात कापणी करून सणाचा आनंद घेण्याचा प्रयत्न करणार असल्याचे दिसते.