98452

दीपावलीनिमित्त जि. परिषदेत
खाद्य पदार्थ स्टॉलचे उद्‍घाटन

सिंधुदुर्गनगरी, ता. १४ ः जिल्हा परिषद प्रशासनातर्फे खास दीवाळी सणानिमित्त आयोजित खाद्य पदार्थ व वस्तूंच्या स्टॉलचे उद्‍घाटन जिल्हाधिकारी तृप्ती धोडमिसे यांच्या हस्ते विविध जिल्हा परिषद अधिकाऱ्यांच्या उपस्थितीत झाले. खाद्यपदार्थ खरेदी करून बचतगटांना प्रोत्साहन द्यावे, असे आवाहन यावेळी उपस्थित मान्यवरांनी केले.
दिवाळी सणानिमित्त आवश्यक खाद्यपदार्थ व वस्तूंच्या विक्रीचे प्रदर्शन जिल्हा परिषद परिसरामध्ये १३ ते १७ ऑक्टोबर दरम्यान आयोजित केले आहे. महाराष्ट्र राज्य ग्रामीण जीवनोन्नती अभियान अंतर्गत ग्रामीण भागातील कार्यरत स्वयं सहाय्यता समूहांनी उत्पादित केलेल्या मालास स्थानिक बाजारपेठ मिळवून देण्याच्या उद्देशाने तसेच स्वयं सहाय्यता समूहांना प्रोत्साहित करण्याच्या उद्देशाने दीपावली सणाचे निमित्त साधून जिल्हा परिषद सिंधुदुर्ग व उमेद अभियानामार्फत दीपावली सणासाठी आवश्यक साहित्य, आकाश कंदील, फराळ, मिठाई व विविध वस्तूंच्या विक्रीचे प्रदर्शन १३ ऑक्टोबर ते १७ ऑक्टोबर २०२५ या कालावधीमध्ये जिल्हा परिषद सिंधुदुर्ग कार्यालयाच्या परिसरामध्ये आयोजित केले आहे. आज जिल्हाधिकारी धोडमिसे यांच्या हस्ते व जिल्हा परिषद मुख्य कार्यकारी अधिकारी रवींद्र खेबुडकर यांच्या प्रमुख उपस्थितीत उद्‍घाटन झाले. यावेळी उपमुख्य कार्यकारी अधिकारी जयप्रकाश परब, जिल्हा ग्रामीण विकास यंत्रणा प्रकल्प संचालक उदय पाटील आदी उपस्थित होते.