काजू मोहोर संरक्षणविषयक चर्चासत्र
सकाळ वृत्तसेवा
साडवली, ता. १८ : कोकणातील प्रमुख नगदी फळपीके असलेल्या आंबा आणि काजूपिकांवरील मोहोर संरक्षण व व्यवस्थापन या महत्त्वाच्या विषयावर मार्गदर्शन होणार आहे. त्यासाठी डॉ. वैभव शिंदे, सहयोगी संशोधन संचालक, प्रादेशिक फळसंशोधन केंद्र, वेंगुर्ला हे देवरूख येथे येणार आहेत. विशेष चर्चासत्र सोमवारी (ता. २७ ) सकाळी १०.३० वा. पंचायत समिती देवरूख येथील छत्रपती संभाजी महाराज सभागृहात आयोजित करण्यात आले आहे.
सकाळच्या सत्रात आंबा मोहोर संरक्षण व व्यवस्थापन तर दुपारच्या सत्रात काजू मोहोर संरक्षण व व्यवस्थापन यावर डॉ. शिंदे यांचे सविस्तर मार्गदर्शन होईल. दोन्ही सत्रांनंतर प्रश्नोत्तरे व शेतकऱ्यांशी मुक्त चर्चा आयोजित करण्यात आली आहे. या चर्चासत्राचे आयोजक संगमेश्वर नैसर्गिक शेती गट व संगमेश्वर तालुका अॅग्रोस्टार फार्मफ्रेश शेतकरी उत्पादक कंपनी आहेत. या निमित्ताने संगमेश्वर नैसर्गिक शेती गटप्रमुख हेमंत तांबे आणि अॅग्रोस्टार फार्मफ्रेश चेअरमन विलास शेलार यांनी तालुक्यातील जास्तीत जास्त शेतकऱ्यांनी उपस्थित राहावे, असे आवाहन केले आहे.