गणपतीपुळे किनारी जेलीफिशचे संकट
सकाळ वृत्तसेवा
रत्नागिरी, ता. २८ ः तालुक्यातील श्रीक्षेत्र गणपतीपुळे येथे सध्या दिवाळी सुटीमुळे पर्यटकांची गर्दी वाढली आहे. या ठिकाणी आलेल्या पर्यटकांना समुद्रकिनाऱ्याची भुरळ पडत आहे. त्यामुळे समुद्रकिनाऱ्यावर पाण्यातून चालण्याचा काहीजण आनंद लुटतात; परंतु सध्या येथील समुद्रकिनाऱ्यावर जेलीफिशचे मोठ्या प्रमाणात साम्राज्य पसरले असून, पर्यटक हैराण झाले आहेत.
जेलीफिशबाबत स्थानिक ग्रामस्थ आणि व्यावसायिकांनी सांगितले की, जेलीफिशचा स्पर्श होताच अंगाला खूप वेदना होतात. या स्पर्शामुळे अंगावर बारीक पुरळ व स्पर्श झालेल्या ठिकाणाचा भाग लाल होतो. तसेच जेलीफिशचा स्पर्श झाल्याने वेदनेमुळे हाताने तो भाग चोळल्यास आणखी त्रास होतो. यावर उपाय म्हणजे जेलीफिशचा स्पर्श झाल्यास अगदी व्यवस्थित तळहाताने निळा दोरा काढल्यास वेदना कमी होतात. तसेच काहीवेळा जवळजवळ चार ते पाच तास वेदना होत राहतात व तापही येतो. त्यामुळे जेलीफिशचा स्पर्श झाल्यास तत्काळ डॉक्टरकडे जावे. जेलीफिशचे अस्तित्व आढळल्याने पर्यटक तसेच भाविकांनी समुद्रात जेलीफिश ज्या ठिकाणी असतील तेथे पाण्यात उतरू नये, असे आवाहन स्थानिक ग्रामस्थ, किनाऱ्यावरील व्यावसायिक, ग्रामपंचायत, देवस्थान समिती आणि पोलिस यंत्रणेच्यावतीने करण्यात आले आहे.