मालवणात उद्या ''स्तुती गौरव दिन''
सकाळ वृत्तसेवा
मालवण, ता. ५ : भारतीय स्वातंत्र्य संग्रामातील अत्यंत महत्त्वाचे आणि प्रत्येक भारतीयाच्या मनात देशभक्तीची ज्योत प्रज्वलित करणारे ''वंदे मातरम्'' या गीताला यंदा १५० वर्षे पूर्ण होत आहेत. या ऐतिहासिक आणि सांस्कृतिकदृष्ट्या महत्त्वाच्या घटनेनिमित्त कौशल्य, रोजगार, उद्योजकता आणि नावीन्यता विभाग, सांस्कृतिक कार्य विभाग महाराष्ट्र शासन यांच्या संयुक्त विद्यमाने शुक्रवारी (ता. ७) सकाळी ९ वाजता पालिकेच्या मामा वरेरकर नाट्यगृह येथे भारत मातेच्या स्तुतीचा गौरव दिन व वंदे मातरम गीताचे सामूहिक गायन कार्यक्रमाचे आयोजन करण्यात आले आहे. सांस्कृतिक कार्य मंत्री ॲड. आशिष शेलार, उद्योजकता मंत्री ॲड. मंगल प्रभात लोंढा यांच्या संकल्पनेतून हा कार्यक्रम होत आहे. राज्यातील ३५८ तालुक्यांतील ५ हजार अधिक देशप्रेमींसोबत सार्ध शताब्दी महोत्सव साजरा केला जाणार आहे. या कार्यक्रमाचे प्रमुख मार्गदर्शक मुख्यमंत्री देवेंद्र फडणवीस, अध्यक्ष तहसीलदार वर्षा झालटे, प्रमुख वक्ता म्हणून श्री शिवराज मंचचे अध्यक्ष भूषण साटम हे मार्गदर्शन करणार आहेत. या कार्यक्रमात नागरिकांनी मोठ्या संख्येने सहभागी व्हावे, असे आवाहन करण्यात आले आहे.