एकाच धनादेशाच्या दोन नोंदीचा प्रकार
नव्या नियमामुळे घोळ ; रत्नागिरीत ग्राहक त्रस्त
सकाळ वृत्तसेवा
रत्नागिरी, ता. ७ : एका दिवसात बॅंकेत भरलेला धनादेश वटणार या बॅंकांच्या नव्या नियमाचा त्रास ग्राहकांना होत आहे. एकाच धनादेशाच्या २ नोंदी झाल्याचा प्रकारही घडला आहे. यामुळे अनेक ग्राहकांना मनस्ताप आणि भूर्दंड सहन करावा लागत आहे, असा अनुभव काही ग्राहकांनी ''सकाळ''कडे मांडला. याबाबत सुधारणा व्हावी, अशी मागणीही ग्राहकांनी बॅंकांकडे केली आहे.
बँकांच्या धनादेश वटणावळीमध्ये काहीठिकाणी गोंधळ होत असून, त्याचा फटका ग्राहकांना बसत आहे. याबाबत एका खातेदाराने सांगितले, की एका बँकखात्यावर धनादेश काढून तो त्याच्यात एका दुसऱ्या बँकखात्यात भरला. धनादेश पन्नास हजार रुपयांचा होता. अक्षरी व अंकी यामध्ये एकच रक्कम होती. ज्या बँकेत भरला त्या बॅंकेने ५ हजार रुपयांचा धनादेश वटला, असा संदेश मोबाईलवर पाठवला. ज्या बँकेतून धनादेश काढला तिनेही पाच हजार रुपये वर्ग झाल्याचा संदेश पाठवला. त्यानंतर खातेदाराने लगेच खातेपुस्तक भरून आणले तर त्यातही ५ हजार रुपये वळते झाल्याचे दिसले. या संबंधी ग्राहकांनी सांगितले की, धनादेश ५० हजार रुपयांचा असून, दोन्ही बॅंकांनी ५ हजार रुपयांचा व्यवहार केला.