03260

कणकवलीत २७ जणांचे रक्तदान
कणकवली, ता. १० : तालुका पत्रकार संघ हा नेहमीच बातम्यांचा मंच म्हटला जातो. आता तो समाजातील मानवतेचा मंच झाला आहे असे प्रतिपादन प्रांताधिकारी जगदिश कातकर यांनी येथे केले.
कणकवली तालुका पत्रकार संघ, सिंधु रक्तमित्र संघटना प्रतिष्ठान, सिंंधुदुर्ग जिल्हा रक्तपेढी यांच्या संयुक्त विद्यमाने येथील भवानी सभागृहात रक्तदान शिबिर झाले. उद्‍घाटनप्रसंगी प्रांताधिकारी बोलत होते. यावेळी ज्‍येष्‍ठ पत्रकार आणि वृत्तपत्र विक्रेते अशोक करंबेळकर, सिंधु रक्तमित्र संघटनेचे मकरंद सावंत, जिल्हा रक्तपेढीच्या डॉ. भारती ठोंबरे आदी उपस्थित होते.
शिबिरात २७ जणांनी रक्तदान केले. शिबिर यशस्वी होण्यासाठी रक्तपेढीची प्रांजली परब, नितीन तुरनार, जोसेफ पिंटो, मयुर शिंदे, गणपत गाडगे, सागर सावंत, आदींनी मेहनत घेतली. प्रमाणपत्र व पुष्पगुच्छ देऊन रक्तदात्यांचा सत्कार करण्यात आला. भगवान लोके, संजय सावंत यांनी आभार मानले.