03249
अंबाबाई मंदिरात आजपासून किरणोत्सव

सकाळ वृत्तसेवा
कोल्हापूर, ता. ८ ः करवीर निवासिनी श्री अंबाबाई देवीच्या किरणोत्सव सोहळ्याला उद्या (रविवार) पासून सुरुवात होत आहे. किरणोत्सव मार्गात येणारे अडथळे आज दूर करण्यात आले. त्यामुळे सोहळ्याच्या पूर्वसंध्येला किरणे देवीच्या खांद्यापर्यंत पोहोचली.
अंबाबाई देवीचा वर्षातून दोनदा किरणोत्सव होतो. पहिला दक्षिणायन किरणोत्सव सोहळा नोव्हेंबर महिन्यातील ९ ते १३ तारखेदरम्यान होतो, तर दुसरा फेब्रुवारी महिन्यात उत्तरायण किरणोत्सव सोहळा पार पडतो. पाच दिवसांच्या किरणोत्सव सोहळ्यात मावळतीची सूर्यकिरणे महाद्वारातून अंबाबाई मंदिरात प्रवेश करतात. प्रवासाचा एक एक टप्पा पार करीत पहिल्या दिवशी सूर्यकिरणे अंबाबाई मूर्तीचा चरणस्पर्श करतात. दुसऱ्या दिवशी कमरेपर्यंत आणि तिसऱ्या दिवशी सूर्यकिरणे चेहऱ्यावर येऊन किरणोत्सव सोहळा पूर्ण होतो. हा सोहळा अनुभवण्यासाठी देश-विदेशांतून मोठ्या संख्येने भाविक येतात. यंदाही गर्दीचे नियोजन करण्यात आले आहे. त्यासाठी मंदिर परिसरासह विविध ठिकाणी मोठ्या एलईडी स्क्रीनची व्यवस्था करण्यात आली आहे. या सोहळ्याचे लाईव्ह दर्शन संकेतस्थळ व सोशल मीडिया ॲप्लिकेशन्स यावरही होणार आहे. तरी याचा लाभ घ्यावा, असे आवाहन पश्‍चिम महाराष्ट्र देवस्थान समितीतर्फे करण्यात आले आहे.