03503

सहकाराच्या बळावर ‘डिजिटल’कडे वाटचाल

मनीष दळवी ः प्राथमिक शिक्षक पतपेढीचे कार्य उल्लेखनीय

सकाळ वृ्त्तसेवा
सिंधुदुर्गनगरी, ता. १० ः सहकार आणि कोकणचे नाते दिवसेंदिवस अधिक दृढ होत आहे. प्राथमिक शिक्षक पतपेढी सभासदांच्या सोयीसाठी विविध स्तुत्य उपक्रम राबवत असून, आता डिजिटल सेवेच्या माध्यमातून नव्या युगाची सुरुवात केली आहे, असे गौरवोद्गार जिल्हा बँक अध्यक्ष मनीष दळवी यांनी काढले.
सिंधुदुर्ग जिल्हा प्राथमिक शिक्षक सहकारी पतपेढी मर्या., सिंधुदुर्गनगरी यांच्यावतीने ओरोस येथे सभासद गुणवंत पाल्य गुणगौरव व सभासद अॅप अनावरण सोहळा पार पडला. या कार्यक्रमाचे उद्‍घाटन श्री. दळवी यांच्या हस्ते झाले. पतपेढीचे अध्यक्ष चंद्रसेन पाताडे यांच्या अध्यक्षतेखाली झालेल्या या सोहळ्यास सॉफ्टएड कंपनीचे रिजनल मॅनेजर कृष्णात पोवार, उपाध्यक्ष महेंद्र पावसकर आदी उपस्थित होते.
श्री. पाताडे यांनी आपल्या भाषणात संस्थेच्या चढत्या विकासाचा आलेख मांडत, ‘सहकाराचे मूळ तत्त्व न सोडता आधुनिक तंत्रज्ञानाचा स्वीकार करूया. सभासद ऍप हे केवळ साधन नाही, तर सहकाराचे भविष्य आहे,’ असे आवाहन केले. सॉफ्टएड कंपनीच्या अधिकाऱ्यांनी अॅपविषयी सविस्तर माहिती दिली. कार्यक्रमात शिष्यवृत्ती परीक्षा, दहावी-बारावी, तसेच एमपीएससी परीक्षेत गुणवंत ठरलेल्या विद्यार्थ्यांचा सत्कार करण्यात आला. उपाध्यक्ष महेंद्र पावसकर यांनी प्रास्ताविक केले. मुख्य कार्यकारी अधिकारी अनुराधा माईणकर यांनी आभार मानले. मनोज सावळ, अधीक्षक समीर नातू, संगणक तज्ज्ञ संदीप जांभळे आदींनी कार्यक्रमाचे संयोजन केले.
----
...तर ‘एआय’मुळे अधिक सक्षम!
श्री. दळवी म्हणाले, ‘जिल्ह्याच्या सर्वांगीण विकासासाठी सहकारी संस्थांच्या माध्यमातून आर्थिक देवाणघेवाण व्हावी. सहकारातील पैसा हा जिल्ह्यातील उद्योगधंद्यांत गुंतवला जातो. डिजिटल सेवेसोबत ‘एआय’चाही वापर केल्यास आपण अधिक सक्षम बनू शकतो. पतपेढी स्वतःच्या भांडवलावर संस्था चालवत असल्याने ही गोष्ट अत्यंत अभिमानास्पद आहे.’