सैतवडे शाळेमधील तिघांची
राष्ट्रीय डॉजबॉल स्पर्धेसाठी निवड
सकाळ वृत्तसेवा
रत्नागिरी, ता. १० ः महाराष्ट्र डॉजबॉल असोसिएशनच्यावतीने नुकत्याच आयोजित केलेल्या १५व्या राज्यस्तरीय सबज्युनियर डॉजबॉल स्पर्धेत रत्नागिरी जिल्ह्याच्या संघाने चमकदार कामगिरी करत जिल्ह्याचे नाव उंचावले आहे. या स्पर्धेतून राष्ट्रीयस्तरावर प्रतिनिधीत्व करण्यासाठी रत्नागिरी जिल्ह्यातील ग्रामीण भागातील दी मॉडेल इंग्लिश स्कूल, सैतवडे या शाळेतील तीन गुणवंत खेळाडूंची निवड करण्यात आली आहे. हे खेळाडू येत्या १४ ते १७ नोव्हेंबरदरम्यान गुजरात येथे होणाऱ्या राष्ट्रीय डॉजबॉल स्पर्धेत महाराष्ट्राचे प्रतिनिधित्व करतील.
पुण्यात पिंपरी-चिंचवड येथील हिंदुस्थान अँटिबायोटिक स्कूल, खराळवाडी मैदानावर झालेल्या राज्यस्तरीय स्पर्धेत रत्नागिरीच्या मुलांच्या आणि मुलींच्या दोन्ही संघांनी गुणवत्ता सिद्ध केली. तेथील उत्कृष्ट कामगिरीच्या जोरावर राष्ट्रीय स्पर्धेसाठी निवड झालेल्या खेळाडूंमध्ये ‘दी मॉडेल इंग्लिश स्कूल’च्या विद्यार्थ्यांनी बाजी मारली आहे.​ मुलांच्या संघातून पूजन धातकर याची निवड झाली आहे तर मुलींच्या संघात नंदिनी जाधव आणि धनश्री बळकटे या दोन प्रतिभाशाली खेळाडूंची निवड झाली आहे. या तिन्ही खेळाडूंनी ग्रामीण पार्श्वभूमीवर असूनही खेळाप्रति असलेले त्यांचे समर्पण आणि मेहनत या बळावर राष्ट्रीय स्तरावर मजल मारली आहे. या यशात प्रशालेच्या मार्गदर्शक शिक्षिका जाधव यांचे मोठे योगदान आहे. त्यांनी खेळाडूंना केलेले योग्य मार्गदर्शन आणि त्यांच्याकडून सातत्याने करून घेतलेला सराव यामुळेच हे यश संपादन करता आले आहे.