‘धोपावे-तेटले’मध्ये वाचनालय सुरू
सकाळ वृत्तसेवा
गुहागर, ता. १५ : मुख्यमंत्री समृद्ध पंचायतराज अभियान उपक्रमांतर्गत ग्रामपंचायत धोपावे-तेटले यांच्यावतीने धोपावे शाळा क्र. १ येथे नव्या वाचनालयाचे उद्‍घाटन करण्यात आले. वाचनालयाचे औपचारिक उद्‍घाटन माजी सरपंच व विद्यमान ग्रामपंचायत सदस्य अनंत डावळ यांच्या हस्ते झाले.
या वाचनालयाच्या माध्यमातून ग्रामीण भागातील विद्यार्थ्यांना दर्जेदार शैक्षणिक वाचनसामग्री उपलब्ध होऊन ज्ञानवृद्धीला चालना मिळेल, असा विश्वास व्यक्त करण्यात आला. या वेळी ग्रामपंचायत सरपंच आशीर्वाद पावसकर यांनी उपस्थित विद्यार्थ्यांना आणि ग्रामस्थांना वाचनालयाचे महत्त्व समजावून सांगितले. त्यांनी विद्यार्थ्यांना वाचनाची सवय लावून ज्ञानवृद्धीसाठी वाचनालयाचा अधिकाधिक लाभ घेण्याचे आवाहन केले. ग्रामपंचायत अधिकारी अवनी तवसाळकर यांनी आभार मानले.
---