04513

मुणगे भगवती प्रशालेत ग्रंथदान सोहळा
मुणगे, ता. १५ ः विद्यार्थ्यांमध्ये अभिजात मराठीची गोडी वाढावी, मराठी भाषेच्या शब्दांच्या कूळकथा आणि मूळकथा विद्यार्थी, शिक्षक आणि पालकांना ज्ञात व्हाव्यात, या उद्देशाने कोकण मराठी साहित्य परिषदेचे आजीव सदस्य तथा उद्योगपती भालचंद्र माटवकर (पोयरे, मशवी) यांनी कवी केशवसुत यांच्या स्मृतिदिनानिमित्त येथील भगवती हायस्कूलच्या आठवी आणि नववीच्या विद्यार्थ्यांना ग्रंथदान केले.
माटवकर यांनी सुरेश ठाकूर लिखित ‘शब्दांच्या पलीकडले’ पुस्तकाच्या ५० प्रतींचे वाटप विद्यार्थ्यांना केले. हा ग्रंथदान सोहळा भगवती हायस्कूलच्या सभागृहात झाला. कार्यक्रमाच्या अध्यक्षस्थानी भगवती एज्युकेशन सोसायटी उपाध्यक्ष सुरेश बांदेकर होते. व्यासपीठावर वीलास मुणगेकर (उपाध्यक्ष), हरीश महाले, तेजस बागडे, सुविद्या बोरकर आदी उपस्थित होते. या ग्रंथदानाबद्दल संस्थेतर्फे माटवकर यांचा बांदेकर यांच्या हस्ते शाल, श्रीफळ, पुष्पगुच्छ प्रदान करून सत्कार करण्यात आला. माटवकर यांचे हे योगदान विद्यार्थी, शिक्षक व पालक यांच्यासाठी मोलाचे आहे, असे सांगितले. यावेळी मनोज मुणगेकर, नामदेव बागवे, स्वप्नील कांदळगावकर आदी उपस्थित होते. गौरी तवटे यांनी सूत्रसंचालन केले. प्रसाद बागवे यांनी आभार मानले.